SALMOS 49 - Biblia Guarani Tumpa Iñee

SALMO 49 Mbaeyekou reño yayeko vae mbaetɨ ikavi

¹ Peendu kuae, opaete tëta pegua reta; peyeapɨsaka, opaete ɨvɨ pegua reta,

² iyemboetea vae reta jare iyemboeteambae reta, oikokatu vae reta jare paravete vae reta.

³ Chemiarita arakuaa katu, aendukata chearakuaa katu.

⁴ Ayeapɨsakata ñee arakuaa katu pegua re; arpa ipu ndive jaeta, mbae yavai yae yaikuaa vae.

⁵ ¿Maera pa akɨɨyeta yemboavai reta iara pe, cheöva yave ikavimbae vae pe iyoa vae reta?

⁶ Imbaembae reño oyeko vae reta, jare jeta yae imbaeyekou re oyemboete vae reta,

⁷ metei ave chugüi reta, ngaraa oepɨ jëtara vae, Tumpa pe ave ngaraa oyemboepɨ oyereroasayepe vaerä.

⁸ ¡Echa jekove oyegua ye vaerä jepɨ yae ete ko; jare ngaraai ipuere oyemboepɨ,

⁹ oikove oiko vaerä jekuae avei, jare agüɨye vaerä omano!

¹⁰ Echa, yarakuaa katu vae reta ave ko omano, okañɨtei vi iyarakuaambae reta rami; jare oeya reta imbaeyekou ïru reta pe.

¹¹ Oyemongeta jo oiko aveita, jare oikoa jekuae aveita oiko; jee pe ombojee reta iɨvɨ.

¹² Ërei ngatu kuimbae ngaraa imboetea avei oiko; mɨmba reta ramiño vi ko okañɨtei.

¹³ Kuae oikogüe mbaeä etei ko; ërei jeseve, iñemuña reta güɨrovia katu jae reta iñee.

¹⁴ Vecha reta oyereraja mbaeyukaa pe rami, mano pe oyererajauka reta omanogüe reta ñogüɨnoia pe; jare köe yave, jupi vae reta güɨnoita mbaepuere jese reta; jare opata okañɨ chugüi reta oiko kavi vae, omanogüe reta ñogüɨnoia pe ko oikota.

¹⁵ Ërei ngatu Tumpa chereepɨta omanogüe reta ñogüɨnoia imbaepuere güi. Echa jae chererajata jupíe.

¹⁶ Agüɨye eyemoambeko kia oyemboikokatu yave, jare jo pe jeta mbaembae ikavigüe güɨnoi yave.

¹⁷ Echa omano yave ngaraa mbae ave güɨraja, mbaembae ikavigüe ave ngaraa güɨraja jupíe.

¹⁸ Yepe tëi oikove oiko ramboeve, oyerovia katu, jare imbaeyekou jeko pegua omboete yae vae.

¹⁹ Ërei oväeta ara omano vaerä, jare ngaraa ye ma oecha tembipe.

²⁰ Ërei kuimbae imboetea yae re oyekou vae, mbaetɨ oikuaa yave, mɨmba reta ramiño vi ko okañɨtei.