SALMOS 48 - Biblia Guarani Tumpa Iñee

SALMO 48 Sión ipöra yae jare imboetea yae

¹ ¡YandeYa ko tuichagüe yae! ¡Jupi ko oyemboete yae vaerä jëta guasu pe, iɨvɨtɨ oñeñono teea pe!

² ¡Ipöra yae ɨvɨtɨ guasu Sión, jókuae jovaicho ɨvɨtuguasu kotɨgua! ¡Jae ko opaete ɨvɨ omboyerovia vae! ¡Jae ko Mburuvicha guasu jëta guasu!

³ Tumpa oï o mburuvicha jo Jerusalén pegua pe; jae oyekuaauka metei ñepɨ̈roa ikavi yae vae rami.

⁴ Echa mburuvicha guasu reta ïru ɨvɨ pegua oyemboatɨ jare oporepeña ikotɨ;

⁵ ërei oecha reta jókuae tëta guasu yave, ipɨakañɨ yae reta, ipɨa jopa reta jare opa otekuarai reta.

⁶ Okɨɨye yae reta, mbae jasɨ omborɨrɨi reta, kuña imembɨ oa oï yave vae rami;

⁷ ɨvɨtuakuvo opa güɨrokomegua Tarsis pegua barco reta rami.

⁸ Roendu jesegua rami, jökorai etei roecha, yandeYa Imbaepuere yae ete vae jëta guasu pe, ñaneTumpa jëta guasu pe. ¡Tumpa omopɨ̈ratata jekuae avei pegua!

⁹ CheRu Tumpa, oremaendúa ndeporoparareko re ndetupao pe.

¹⁰ CheRu Tumpa, nderee Tuichagüe oï rami, jökorai ndemboete vae opaete ɨvɨ rupi. Ndembaepuere ndive reyapo jupigüe.

¹¹ ¡Toyerovia yae ɨvɨtɨ Sión! ¡Toyerovia tëta guasu reta Judá pegua reta, jupigüe reyapo vae re!

¹² Peyere peguata Sión re, jare peipapa maeka ɨvate vae reta;

¹³ pemae kavi ikësea re jare mburuvicha jo reta re, pemiari vaerä peñemuña reta taɨkue rupi oimeta vae pe,

¹⁴ echa kuae Tumpa jae ko, oiko avei ñaneTumpa jekuae avei pegua vae. ¡Jae ko yandererajata kutɨ yé mano güi!