SALMOS 47 - Biblia Guarani Tumpa Iñee

SALMO 47 Tumpa, Mburuvicha guasu opaete ɨvɨ re

¹ ¡Opaete vae reta, peyepopete! ¡Pesapúkai Tumpa pe peyerovia katu reve!

² Echa yandeYa Tuichagüe yae ete vae, kɨɨyea ko; jae ko Mburuvicha guasu opaete ɨvɨ re.

³ Jae oñonota tëta reta yogüɨreko vaerä yande yaea re, jare tëtaguasu reta yandepo pe.

⁴ Jae ko oiparavo yandeve yandeɨvɨ reta, Jacob ombotuicha vae, jae jembiaɨu.

⁵ ¡YandeYa Tumpa oyeupi iguapɨa mborookuaía pegua pe, sapúkai yerovia katu pegua jare mimbɨguasu iñee ndive!

⁶ ¡Petairari, petairari Tumpa pe! ¡Petairari, petairari yandeRuvicha guasu pe!

⁷ ¡Petairari Tumpa pe arakuaa katu ndive! ¡Echa jae ko mburuvicha guasu opaete ɨvɨ re!

⁸ ¡Tumpa jae ko mburuvicha guasu tëtaguasu reta re! ¡Oguapɨ iguapɨa ikɨambaea mborookuaía pegua pe!

⁹ Tëta reta juvicha reta oyomboatɨ päve, Abraham iTumpa imbae vae reta ndive,

¹⁰ echa Tumpa imbae ko mbaepuere reta ɨvɨ pegua. ¡Jae ko tuichagüe yae vae!