SALMOS 46 - Biblia Guarani Tumpa Iñee

SALMO 46 YandeYa oï yande ndive

¹ Tumpa ko ñepɨ̈roa jare yeepɨka, mbɨatɨtɨ iara pe yandemborɨ jarembae voi vae.

² Jáeramo, agüɨye yakɨɨye, yepe tëi ɨvɨkana, yepe tëi ɨvɨtɨ guasu opa osururu ɨguasu pe,

³ yepe tëi ɨguasu jɨapu jare opüa ɨaparúa, yepe tëi ɨvɨtɨ guasu reta okana ɨguasu iyarasɨ yae jeko pegua.

⁴ Ɨ̈aka rupi ɨ osɨrɨ vae omboyerovia Tumpa jëta guasu, o mbaemboetea pegua, Tuichagüe yae ete vae oïa.

⁵ Tumpa oime oï pɨpe, ngaraa maratu; Tumpa omborɨta köe yave.

⁶ Jäsémbai tëtaguasu pegua reta, orɨrɨi mborookuaía reta, iñee omoë yave, ɨvɨ opa tɨkui.

⁷ ¡YandeYa Imbaepuere yae ete vae oime yande ndive! ¡Jacob iTumpa jae ko ñaneñepɨ̈roa!

⁸ Peyu pemae yandeYa jembiapo reta re; opa omokañɨtei ɨvɨ.

⁹ Omombɨta ñeraro opaete ɨvɨ rupi; omopë güɨrapa reta, oakɨo mii reta, jare, ¡opa oapɨ tata pe käretou ñeraro pegua reta!

¹⁰ “¡Peñemokïrii! ¡Peikuaa che ko jae Tumpa! ¡Che ko aï opaete tëtaguasu reta iárambo! ¡Chetuicha yaeta opaete ɨvɨ iárambo!”

¹¹ ¡YandeYa imbaepuere yae ete vae oime yande ndive! ¡Jacob iTumpa jae ko ñaneñepɨ̈roa!