SALMOS 45 - Biblia Guarani Tumpa Iñee

SALMO 45 Tairari mburuvicha guasu imenda pegua

¹ Tɨnɨeasɨ ñee kavi chepɨa; chekü ombaekuatía vae ilapi isɨrɨkɨ yae rami. ¡Amondota chetairari mburuvicha guasu pe!

² ¡Nde ko jae kuimbae kavi opaete kuimbae reta güi vae! ¡Ñee kavi oë ndeyuru güi! Jáeramo, Tumpa iporerekua nderé jekuae avei pegua.

³ Jëia vae, ¡eñono ndekúa re ndekɨsepuku! ¡Jae ko ndearuandapa ndeyemboetea!

⁴ Ndeyemboetea toë kavi ndeve, eyapo jupi vae jare añete vae paravete vae reta pe. ¡Ndepo akatu tandemboe mbae tuichagüe re!

⁵ Nderuvɨ jakuaroviasɨ ko, pɨpe opata oa tëta reta nderóvai, nderovaicho reta reñɨvota ipɨa pe.

⁶ CheRu Tumpa, ndeguapɨa mborookuaía pegua jae ko opambae jare jekuae avei vae; ndepo pegua popoka mborookuaía pegua, jae ko jupi vae pegua.

⁷ Reaɨu jupi rupi mbae oyeapo vae jare remotareɨ ikavimbae. Jáeramo ndeparavo Tumpa, jae ko neTumpa; yerovia katu omee ndeve vae ikavi yae, neïru reta omboyerovia vae güi.

⁸ Opaete nderemimonde ikäti kavi mirra pe, áloe jare canela pe; temimbɨ reta tairari pegua pe ndembovɨakatu reta, mburuvicha jo elefante jäimbukugüe pegua pe.

⁹ Mburuvicha guasu reta tayɨ reta ñogüɨnoi ndeɨvɨrigua imboetea yae vae reta ipɨte pe; nderembireko oï ndeakatu kotɨ, oñemopöra ikavi yae reve, oro Ofir pegua pe.

¹⁰ Kuñatai, eyeapɨsaka kavi jaeta ndeve vae re: Neakañɨ nerëtaɨgua güi jare nderu jo pegua reta güi,

¹¹ echa nepöra yae, ndepota yaeta mburuvicha guasu; eyetavatɨka jóvai, echa jae ko ndeya.

¹² Tëta Tiro pegua kuña reta yogüeruta mbota ndive, nemoñerata mboroparareko re oikokatu yae vae reta.

¹³ ¡Mburuvicha guasu tayɨ maepöra yae vae omopöra reïa! ¡Jemimonde imbopotɨa omopöra vae oro pegua!

¹⁴ Temimonde oñemopöra kavi yae ndive oyererajata mburuvicha guasu jóvai, kuñatai reta ndeiño etei kuimbae ndive oasa vae yogüɨrajata jae ndive, jae reta ndive yogüeruta reïa pe.

¹⁵ Yogüeru retata yerovia katu jare vɨakatu reve, jökorai oike retata mburuvicha guasu jo pe.

¹⁶ Mburuvicha guasu, neñemuñagüe reta jendagüe pe oguapɨta nderaɨ reta, jae reta remboguapɨta mburuvicharä opaete ndeɨvɨ rupi.

¹⁷ Che amomaenduaukata nderee re, opaete ñemuña reta jekuae avei rupi, jare opaete vae reta ndemboete aveita.