SALMOS 44 - Biblia Guarani Tumpa Iñee

SALMO 44 Yerure Tumpa iporomborɨ re

¹ CheRu Tumpa, ore etei ko roendu, oreru reta imiari oreve vae, arakae yave reyapo jae reta iara pe vae re.

² Ndembaepuere pe renoe remombo ïru tëtaguasu reta, reiporarauka tëta reta pe, jökorai opa renoe remombo, jare oreñemuñagüe reta reñono joko pe.

³ Echa mbaetɨ opɨ̈ro reta kuae ɨvɨ ikɨsepuku ae pe, mbaetɨ ko iyɨva pe ave oyeepɨ reta. ¡Jaeño ko ndeyɨva jare ndembaepuere rupi! ¡Jembipe reyekuaa vae rupi, echa nde reaɨu yae reta!

⁴ ¡CheRu Tumpa, nde jae ko cheruvicha guasu! Nde reroasayepe Jacob iñemuña reta.

⁵ Ndembaepuere rupi romoamɨri orerovaicho reta; ¡nderee re, oporepeña orekotɨ vae reta re opa ropɨ̈ro!

⁶ Echa ngaraai ayerovia chegüɨrapa re, chekɨsepuku ave ngaraa chereroasayepe;

⁷ echa nde oreövatu orerovaicho reta güi, jare remomaraiuka oremotareɨ vae reta.

⁸ ¡Nde oreTumpa re royembotuichata opaete ara rupi, jare nderee romboete aveita jekuae avei rupi!

⁹ Ërei ngatu oremombo jare oremomaraiuka. Mbaetɨ ma reo oresundaro reta ndive.

¹⁰ Orembotekuaraiuka orerovaicho reta pe, jare oremotareɨ vae reta opa opɨ̈ro orembaembae güɨraja iyeupe.

¹¹ Oremee vecha reta oyereraja mbaeyukaa pe rami; opa oremoai moai tëtaguasu reta rupi;

¹² remeeiño ndembae vae reta, mbaetɨ etei rekovara kërai ave yepe.

¹³ Oremomaraiuka orerëta-ɨpɨ pegua reta pe, oreyóyai yoyaiuka oreɨvɨrigua reta pe.

¹⁴ Oreñono tëtaguasu reta iñeerä; orereecha reta yave, ombovava iñäka omae oreré.

¹⁵ Ara ñavo aiko ñemomarai rupi; cherova kërai cheapo,

¹⁶ cherovaicho jei jare oeka ikavimbae oyapo vaerä cheve vae jeko pegua, tovaicho jare iyepɨse vae jeko pegua.

¹⁷ Opaete kuaekuae reta ou oreve, ërei mbaetɨi oreakañɨ ndegüi, mbaetɨ vi royavɨ ndeporogüɨrökuavee päve.

¹⁸ Mbaetɨ orepɨa opia ndegüi, mbaetɨ vi ropia nderemimbota güi.

¹⁹ Ërei ngatu nde oreñono mbaeporou jenda pe. ¡Oreñono romano rape katúa pe!

²⁰ Oreakañɨ yave mona nderee güi oreTumpa, ani roupi orepo romboete vaerä tumpa ambuae,

²¹ ¿mbaetɨta ra reikuaa kuae re? Echa nde reikuaa ko opaete mbae oñemi oï kuimbae ipɨa pe vae.

²² Ërei nderé rogüɨrovia jeko pegua, yemomburu rupi roiko ara ñavo; oyemongeta reta oreré vecha oyeyukata mbaeyukaa pe vae re rami.

²³ ¿Maera pa reke cheYa? ¡Epa! ¡Epa, agüɨye eyembosɨrɨ oregüi jekuae avei pegua!

²⁴ ¿Maera pa orereeya, jare neakañɨ orepɨatɨtɨ reta güi, jare roikoasɨ katu vae güi?

²⁵ Echa orembokangɨ yae ma ko, oremboyapayerei ɨvɨ rupi.

²⁶ ¡Epüa oremborɨ, jare orereepɨ ndeporoparareko jeko pegua!