SALMOS 41 - Biblia Guarani Tumpa Iñee

SALMO 41 Yerure tekovekatu re

¹ Toyerovia jókuae oyemongeta paravete vae re vae, yandeYa oepɨta tembiporara iara pe.

² YandeYa oyangarekota jese, omeeta chupe tekove, oyeroviata oiko ɨvɨ pe; ngaraa oeya jovaicho reta oyuvanga vaerä jese.

³ YandeYa oyangarekota jese imbaerasɨ yave, jupa rupi oiko reve okuera katuta.

⁴ Che jae: “CheYa, cheparareko; chembogüera, yepe tëi cheyoa ndekotɨ.”

⁵ Cherovaicho reta imiari kaviä cheré, oparandu reve: “¿Kërai yave ra omanota jare jee okañɨta?”

⁶ Jare yogüeru omae reta cheré yave, chemomiari reta añete rami; ërei ipɨa pe oñovatu ikavimbae, jare ikatu rupi oë yave omoërakua reta.

⁷ Oyomboatɨ iñeenguru chekotɨ opaete chemotareɨ vae reta; oyemongeta reta ikavimbae, jei reve chekotɨ:

⁸ “Mbae ikavimbae vae oya jese; oa jupa pe, ngaraa ma opüa ye.”

⁹ Chevɨaka ave, jese arovia katu vae, okaruse che ndive vae, oyeapa cheré.

¹⁰ Ërei ngatu nde cheYa, cheparareko jare chemopüa, jare tayepɨ jese reta.

¹¹ Kuae re taikuaa rombopɨakatu ko vae, cherovaicho reta agüɨye tachemoamɨri.

¹² Echa che aiko jupi rupi ramo cheangareko, jare cheñono nderóvai jekuae avei pegua.

¹³ ¡Toyemboeteuka cheYa, Israel iTumpa, jekuaekuae avei! ¡Amén! ¡Amén!