SALMOS 40 - Biblia Guarani Tumpa Iñee

SALMO 40 Mbaemboete Tumpa iporogüɨroasayepe re

¹ Chepɨaguasu reve aäro yandeYa, jae omboɨke iyapɨsa chekotɨ oendu vaerä chesapúkai;

² jare cherenoeuka ɨvɨkua yasuru vae güi, tuyuapo yasuru yae vae güi. Oñono chepɨ ita tuicha vae re; jare chemopɨ̈rata aguata vaerä.

³ Oñono cheyuru pe tairari ipɨau vae, tairari mbaemboete pegua ñaneTumpa pe. Jeta vae kuae oechata, jare ipɨakañɨta, jare oyeko retata yandeYa re.

⁴ ¡Toyerovia kuimbae oyeko yandeYa re vae, mbaetɨ omae ipɨayemboete vae reta re vae, ani tumpa-raanga omboete vae reta re vae!

⁵ CheYa Tumpa, jeta yae ko mɨakañɨ reta reyapogüe jare ndeyemongeta reta orekotɨ. ¡Oyepapa rapeä nderóvai! Yepe tëi amoërakua jare chemiari jese reta, ngaraa opa amoërakua.

⁶ Mɨmba oyeyukagüe jare mbota mbaetɨ ndembopɨakatu; mɨmba oyeyukagüe opaetei oyeapɨ vae jare ñɨ̈ro pegua mbaetɨ reeka oreve, ërei reipea cheapɨsa.

⁷ Jáeramo jae: “Mase, ko ayu; tembikuatía oyepomombɨ vae pe, oyekuatía oï cheregua.

⁸ Nderemimbota ayapo vae chemboyerovia cheRu Tumpa. ¡Ndeporookuai oï chepɨa pe!”

⁹ Amoërakua jupi vae jeta yae vae oyemboatɨa pe, mbaetɨ chekïrii apɨta, cheYa, nde reikuaa.

¹⁰ Mbaetɨ cheyeño anoi nde ko jupi vae, amoërakua jupi reyapo vae jare reporogüɨroasayepe vae. Mbaetɨ aikuaku ndeporoparareko jare neñee añete vae yemboatɨ tuicha vae rupi.

¹¹ CheYa, agüɨye neräkateɨ cheve ndeporoparareko re, ndeporoparareko jare neñee añete vae rupi cheövatu avei.

¹² Echa jeta yae ikavimbae ou cheré, cherupitɨ ikavimbae ayapogüe, mbaetɨ chemomae; chea güi jeta yeyé oñemoïru cheve, mbaetɨ ma chembopuere.

¹³ CheYa Tumpa, eyapo ikavi vae cheve, chereepɨ. CheYa, jarembae voi eyu chemborɨ.

¹⁴ Metei rami toñemomaraiuka reta, cheyuka vaerä chereeka vae reta, totekuarai reta chegüi, toñemomaraiuka reta, ikavimbaeño oipota cheve vae reta.

¹⁵ Topa totekuarai imara reve. ¡Osapúkai púkai cheré vae reta!

¹⁶ Ërei toyekou jare toyerovia nderé opaete ndereeka vae reta; oaɨu avei ndeporogüɨroasayepe vae reta, tei: “¡YandeYa tuicha yae ko!”

¹⁷ Yepe tëi chepɨatɨtɨ jare mbae oata cheve, nde cheYa nemaenduata cheré. Nde ko jae chemborɨ vae jare chereroasayepe vae. ¡CheRu Tumpa, agüɨye ndepɨaguasu!