SALMOS 39 - Biblia Guarani Tumpa Iñee

SALMO 39 Tekove michi peguaño ko

¹ Che jae: “Tayangareko chereko re, agüɨye vaerä cheyoa cheñee rupi, tayeyuruopɨ, jeko kavimbae reta ñogüɨnoi ramboeve cheróvai.”

² Mbaetɨ amoë cheñee, kïrii apɨta, ¡jupi vae re ave mbaetɨ chemiari! Jáeramo mbae jasɨ jeiete cheve.

³ Ërei ¡cheɨvɨte pe jakuvo! Chepɨa pe ayemboakuvo, jare jae cheñeeäta reve:

⁴ “CheYa, eikuaauka cheve cherekove iyapɨ, mbovɨ ara ra aikoveta aiko vae, ¡taikuaa cheyegua michi peguaño aikota vae!

⁵ Remee cheve mbovɨ araño aikove aiko vaerä, cherekove mbaeä etei ko ndeve, ¡añetete opaete kuimbae oikove vae mbaeä etei ko!

⁶ ¡Añetete opaete kuimbae oasa küaraɨa ramiño! Añetete oyemoambekoiño ma, omboatɨ mbatee mbaeyekou vae, mbaetɨ oikuaa kia imbaerä ko vae.

⁷ Añave cheYa, ¿kia re pa aärota? ¡CheYa, ndereño ko cheporoäro!

⁸ Chereepɨ opaete ayapombae ndeporookuai vae güi; agüɨye cheñono cheyóyai yóyai vaerä yarakuaambae reta.

⁹ Chekïrii, mbaetɨ cheñee amoë, echa nde ko opaete mbae reyapo.

¹⁰ Eekɨ chegüi reiporarauka cheve vae; cheyukata ma ndepo reñono cheré vae.

¹¹ Kuimbae rembosɨmbi tembiporara rupi mbaeyoa güi, kupii mbae omboai rami, remboai jae oaɨu yae vae. ¡Añetete mbaeä etei ko kuimbae!

¹² CheYa Tumpa, eendu cheyerure, ¡eyeapɨsaka asapúkai ndeve vae re! ¡Agüɨye emaeiño tayaeo! Echa che, oguataiño vae rami ko ndeve, oguataiño vae cheñemuñagüe reta rami.

¹³ Emaeño mo cheré, tachepɨ̈rata ye, ndei amano mbove.”