SALMOS 38 - Biblia Guarani Tumpa Iñee

SALMO 38 Oyembopɨambuae vae iyerure

¹ CheYa, agüɨye eñeengata cheve ndearasɨ reve, agüɨye chenupa ndearasɨ yae reve.

² Echa nderuvɨ reta cheɨ̈vo, ¡ndepo reitɨ cheré!

³ Chemombaerasɨ ndearasɨ, opaete cherete remombaerasi, ¡opaetei chekägüe imbaerasɨ, cheyoa jeko pegua!

⁴ Echa jupimbae ayapogüe reta aiporara; ipoɨ yae vae rami, mbaetɨ chepuere aropɨa.

⁵ Ipeu jare iine ma chepere reta; mbaetɨ chearakuaa jeko pegua chepere.

⁶ Cheäkatindɨ aguata opaete ara, chepɨatɨtɨ yae jare añemomichiuka.

⁷ Echa cherete jaku yae cheve, ¡opaetei cherete imbaerasɨ!

⁸ Opaetei cherete jasɨ, mbaetɨ etei chepɨ̈rata, ayandu chepɨa pe etei chemoäse.

⁹ CheYa, nde reikuaa opaete aipota vae, ¡chepɨayekɨi reta nde reikuaa katu!

¹⁰ Chepɨatɨtɨ yae aï, chepuere veä ma, ¡jäve ma amae!

¹¹ Chevɨa-ïru jare cherëtara reta, opa chereeya chepere reta jeko pegua, cheɨvɨrigua reta opa chereeya.

¹² Oipota cheyuka vae reta, oñono cheraperä pe ñuai, oipota maratu cheapo vae reta imiari kaviä chekotɨ; chemomburu reta opaete ara rupi.

¹³ Ërei che ayeapo iyapɨsambae rami, mbaetɨ aendu, iñeembae rami, mbaetɨ cheñee amoë.

¹⁴ Aiko iyapɨsambae rami, mbaetɨ amoë cheñee ayeepɨ vaerä.

¹⁵ Echa ndereño ayeko cheYa Tumpa, nde reikuaata mbae reyapo vaerä chupe reta cheYa Tumpa.

¹⁶ Agüɨye tacheyóyai yóyai reta, cheamɨri yave, agüɨye toyembotuicha reta.

¹⁷ Ërei che agüɨapita ete ma, mbae jasɨ reta mbaetɨ etei chereeya.

¹⁸ Jáeramo amombeuta ikavimbae ayapo vae, ayembopɨatɨtɨta cheyoa re.

¹⁹ Echa cherovaicho reta jeta oñemoïru, jeta yae chemotareɨ jupimbae reve vae reta.

²⁰ Omboekovia reta cheve ikavi ayapo vae ikavimbae pe, oñemopüa chekotɨ reta, ikavi vae ayapo vae jeko pegua.

²¹ CheYa Tumpa, ¡agüɨye chereeya! CheRu Tumpa, agüɨye esɨrɨ chegüi.

²² CheYa Tumpa, chereroasayepe vae, jarembae voi eyu chemborɨ.