SALMOS 37 - Biblia Guarani Tumpa Iñee

SALMO 37 Jeko kavimbae reta jeko

¹ Jeko kavimbae reta jeko pegua agüɨye ndearasɨ; agüɨye vi ndeakatúä jupimbae oyapo vae reta re.

² Echa opata jarembaeño ñana rami, ¡opata ipiru ñana rokɨ rami!

³ Eyeko yandeYa re, jare eyapo ikavi vae; reikota ɨvɨ pe, jare jae ndeangarekota jupi rupi.

⁴ Eyerovia katu vi yandeYa re, jare jae omeeta ndeve ndepɨa reve reiporu vae.

⁵ Eñeñono yandeYa ipo pe, eyeko jese, jare jae ndemborɨta ko.

⁶ Omboyekuaata jupi rupi reiko vae tembipe rami, jare ndereko kavi ara mbɨte pe ma kuaraɨ rami.

⁷ Nekïrii eiko yandeYa jóvai, jare eäro. Agüɨye neñeenguru oiko kavi vae kotɨ, jókuae kuimbae oyapo ikavimbae vae kotɨ.

⁸ Eeya arasɨ, esɨrɨ mbochɨ güi; agüɨye etei eñemokɨ̈reɨ reyapo vaerä ikavimbae.

⁹ Echa jeko kavimbae reta oñemokañɨteita ko; ërei ngatu yandeYa re oyeko vae reta, güɨnoita ɨvɨ imbaerä.

¹⁰ Jarembaeño mbaetɨta ma yogüɨreko jeko kavimbae reta, peeka tëita ñogüɨnoia rupi, ërei mbaetɨta peväe chupe.

¹¹ Ërei oñemomichi vae reta, güɨnoita imbaerä ɨvɨ, yogüɨreko pɨagüiveta mbɨakatu rupi.

¹² Iyoa vae oeka oyapo vaerä ikavimbae jupi vae kotɨ, omotareɨ yae omae jese.

¹³ Ërei yandeYa oyoyaiñota, echa oikuaa köiño ma ou oiporara vaerä.

¹⁴ Iyoa vae reta güɨnoe ikɨsepuku jɨru güi jare omoata igüɨrapa, oyuka vaerä paravete vae jare mbae oata chupe vae, ¡oyuka vaerä jeko kavi vae reta!

¹⁵ Ërei ikɨsepuku pe aeño omanota, jare igüɨrapa reta opata oñemopë.

¹⁶ Jupi vae mbovɨ mbae güɨnoi vae ikavi ko, iyoa vae reta jeta mbaeyekou güɨnoi vae güi.

¹⁷ Echa iyoa vae reta opata ko, ërei jupi vae reta omborɨ vae jae ko yandeYa.

¹⁸ YandeYa oyangareko jupi yogüɨreko vae re, jae reta imbae ɨvɨ oikota jekuae avei rupi.

¹⁹ Ngaraa oñemomaraiuka oime yave mbae oata, karuai yave jae reta güɨnoita tembíu.

²⁰ Ërei iyoa vae reta omanota, yandeYa jovaicho reta opata ókai vecha kuimbae ikɨragüe rami, opata okañɨtei reta tätati rami.

²¹ Iyoa vae ombaeporu yave mbaetɨ omboepɨ; ërei jupi vae iporoparareko jare omee ngatu.

²² Echa yandeYa iporerekua jese vae güɨnoita ɨvɨ, ërei oyepopeyu jese vae okañɨteita.

²³ YandeYa ko oñono kavi kuimbae kërai oiko vaerä, chupe jaekavi vae rupi;

²⁴ maratu oasa yave, ngaraa opɨta jökorai, echa yandeYa ko omborɨ.

²⁵ Chetaɨrusu güive añave chendechi pe, mbaetɨi aecha jupi vae imborɨambae vae, ani iñemuña reta oyerure tembíu re vae.

²⁶ Ara ñavo iporoparareko jare oiporuka mbae, iñemuña reta yogüɨreko iporerekua vaerä.

²⁷ Eyembosɨrɨ ikavimbae güi jare eyapo ikavi vae, jare reikota jekuae avei pegua.

²⁸ Echa yandeYa oaɨu isɨmbi rupi mbae oyeapo vae, mbaetɨ oeya oñeñono tee chupe vae reta, oyangarekota jese reta jekuae avei; ërei iyoa vae reta iñemuña opata okañɨtei.

²⁹ Jupi vae reta güɨnoita imbaerä ɨvɨ, jare yogüɨreko aveita jókuae ɨvɨ pe.

³⁰ Jupi vae, iñee omoë yarakuaa katu reve, imiari jupi rupi.

³¹ ITumpa iporookuai oï ipɨa pe, jáeramo ngaraai ogüɨapi.

³² Iyoa vae oipïaro jupi vae, oipota oyuka.

³³ Ërei yandeYa ngaraa omaeño oa ipo pe, ngaraa vi omaeño oyemboekouka oñejäa yave.

³⁴ Eyeko yandeYa re, eyapo jae jemimbota, jae ndembotuichata jare omeeta ndembaerä ɨvɨ. ¡Iyoa vae reta oñemokañɨteiuka yave, reechata!

³⁵ Aecha iyoa vae ipɨayemboete yae, oyembotuicha, ɨvɨra jokɨ katu vae jäka oyembotuicha rami.

³⁶ Ërei opa oasa, jare mbaetɨ ma oiko, aeka tëi, ërei mbaetɨ ma aväe.

³⁷ Emae jupi oiko vae re, echa oime yerovia katu jókuae kuimbae mbɨakatu rupi oiko vae pe.

³⁸ Ërei ipɨapochɨ vae reta metei jeia pe oñemokañɨteiukata, iyoa vae reta opata okañɨtei.

³⁹ Ërei jupi vae reta iyereroasayepe ou yandeYa güi, jae ko iñepɨ̈roa mbɨatɨtɨ iara pe.

⁴⁰ YandeYa omborɨta jare oepɨta, oepɨta iyoa vae reta güi jare güɨroasayepeta, echa yandeYa reño oyeko reta.