SALMOS 36 - Biblia Guarani Tumpa Iñee

SALMO 36 Tumpa iporoparareko

¹ Mbaeyoa jei jupimbae ipɨa pe, mbaetɨ vaerä oipoɨu Tumpa güi.

² Omboyukɨ iñee iyeupe aeño, kërai iyoa mbaetɨta oñeväe jare oñereröɨro chugüi.

³ Iyuru güi oë ñee jupimbae jare yembotavɨ pegua; oeya arakuaa katu jare mbaetɨ ma oyapo ikavi vae.

⁴ Jupa pe oyemongeta ikavimbae reño; oiko ikavimbae rupi, mbaetɨ güɨröɨro ikavimbae.

⁵ CheYa, ndeporoparareko oupitɨ ara, jare ndembaejupi oupitɨ amapɨtu.

⁶ Ndembaejupi ndeɨvɨtɨ guasu rami ko; neporojäa reta ɨguasu tɨpɨ yae vae rami, cheYa Tumpa, nde reñovatu kuimbae jare mɨmba.

⁷ ¡CheRu Tumpa, ikavi yae ko ndeporoparareko! ¡Jáeramo, kuimbae reta oeka oñepɨ̈ro vaerä ndepepo igüɨ pe rami!

⁸ Ipɨakatuta opɨta reta, jeta tembíu ndero pe oï vae re; nde remeeta jou ɨ ikavi yae vae,

⁹ echa nde renoi ɨ tekove pegua, ndereño orepuere roikove.

¹⁰ Eiparareko ndekuaa vae reta, jupi vae reta pe emee ndembaejupi.

¹¹ Agüɨye toporepeña cheré ipɨapochɨ vae reta, agüɨye tachemoambeko iyoa vae reta.

¹² ¡Mase, opa oa ikavimbae iyapoa reta, oyeitɨuka jare ngaraa ye opüa reta!