SALMOS 35 - Biblia Guarani Tumpa Iñee

SALMO 35 Yerure yereroasayepe pegua tovaicho reta güi

¹ CheYa Tumpa, epüa oyovaicho chekotɨ vae reta re; eñeraro oñoraro che ndive vae reta ndive.

² Eipɨɨ yeopiaka tuicha vae, jare epüa chemborɨ;

³ eipɨɨ nemii, eyopia cheraɨkuemoña vae reta; ere cheve: “¡Che jae ko ndereroasayepe vae!”

⁴ Toñemomaraiuka toyeyoyaiuka oipota cheyuka vae reta; totekuarai reta oñemomarai reve, oipota ikavimbae oyapo cheve vae reta.

⁵ ¡Toyogüɨreko reta, mbae javiyugüe opa ɨvɨtu güɨroveve rami, ndearaɨgua omoña reta yave!

⁶ ¡Tipɨtumimbi jare tiïchɨi toï jape reta, jare ndearaɨgua toaɨkuemoña reta!

⁷ Echa jupimbae reve oñono reta ñuai cheve cheraperä pe; jupimbae reve oyoo reta ɨvɨkua cheraperä pe.

⁸ ¡Iparanoe tosusere reta! ¡Toa reta jókuae ñuai oñono vae pe yeño! ¡Tosusere reta!

⁹ Jayave ayeroviata nderé cheYa, ayeroviata ndeporogüɨroasayepe re.

¹⁰ Opaete chepɨa ndive jaeta: “¿Kia pa nde rami cheYa? Reepɨ oikoasɨ katu vae, imbaepuere yae chugüi vae ipo güi; paravete vae jare mbae oata chupe vae, imbaeyuvanga katu vae güi.”

¹¹ Opüa imiari reta añetembae vae, oparandu reta cheve mbaetɨ aikuaa vae re.

¹² Ikavi ayapo vae omboekovia reta cheve ikavimbae pe, chembopɨatɨtɨ vaerä;

¹³ ërei jae reta imbaerasɨ yave, che ayemonde temimonde mbɨatɨtɨ pegua pe, chepɨatɨtɨ jese reta güi ayekuaku tembíu güi, chepɨa rupi ayerure avei jese reta.

¹⁴ Chevɨa-ïru re rami, cherëtara ete re rami aiko. Chepɨatɨtɨ yae, chesɨ omano chegüi rami.

¹⁵ Ërei che cheamɨri yave, opaete cheyóyai yóyai vae. Oporomotareɨ vae reta oyomboatɨ chekotɨ, che mbaetɨ aikuaa vae reta, jasɨ katu avei rupi cherereko reta.

¹⁶ Chemboete raanga, cheyóyai yóyai reta, omae reta cheré chemotareɨ yae reve.

¹⁷ CheYa, ¿kërai yave regua pa remaeiñota reiko cheré? ¡Chereroasayepe iporomokañɨtei reta güi, chereroasayepe yaguapope rami vae reta güi!

¹⁸ Ameeta yasoropai ndeve ndembae jeta vae reta jovake, ¡romboeteta jeta yae vae reta ipɨte pe!

¹⁹ Agüɨye tacheyóyai yóyai, jupimbae reve oyovaicho reta chekotɨ vae, ani jupimbae reve jesatï chemotareɨ vae reta.

²⁰ Echa mbaetɨ imiari reta mbɨakatu; oyemongeta reta ombotavɨ vaerä teko kavi rupi yogüɨreko vae reta.

²¹ Tuicha opopira reta iyuru chekotɨ; jei reta: “¡Ore etei roecha!”

²² ¡CheYa Tumpa, nde reecha ko! ¡Agüɨye nekïrii! ¡Agüɨye eyembosɨrɨ chegüi!

²³ CheYa Tumpa, chereepɨ, ¡epa jare epüa eyapo cheve jupi vae!

²⁴ CheYa Tumpa, chejäa, nde ko jupi vae, ¡agüɨye tacheyóyai yóyai reta!

²⁵ Agüɨye tei reta ipɨa pe: “¡Jae ko kuae yaipota vae! ¡Jaema ko ñamokañɨtei!”

²⁶ Toñemomaraiuka jare tipɨa jopa reta metei rami, oipota ikavimbae oyapo cheve vae reta. Timara jare tipɨa jopa topɨta oyembotuicha chekotɨ vae reta.

²⁷ Ërei totairari jare toyerovia chereepɨ yogüɨreko vae reta; jare tei avei reta: “¡YandeYa tuicha yae ko, jae ipɨakatu, jembiokuai ipɨakatu oï yave!”

²⁸ Che chemiarita ndejupi vae re, romboeteta opaete ara.