SALMOS 34 - Biblia Guarani Tumpa Iñee

SALMO 34 Tumpa iporoñovatu

¹ Amboete aveita yandeYa opaete ara rupi; cheyuru pe oïta jekuae avei mbaemboete ikotɨ.

² YandeYa re chepɨayemboeteta; ¡oñemomichi vae reta oenduta, jare oyerovia yaeta!

³ Embotuicha yandeYa che ndive, yambotuicha päve jee.

⁴ Aeka yandeYa, jare jae oendu cheve, jare chereepɨ opaete mbae chemongɨɨye vae reta güi.

⁵ Omae jese vae reta oyerovia katu, mbaetɨ oñemomaraiuka reta.

⁶ Che, paravete vae asapúkai jare yandeYa oendu cheve, jare chereepɨ opaete chepɨatɨtɨ güi.

⁷ YandeYa iaraɨgua oiko, oipoɨu chugüi vae reta iyɨ́vɨri jare oepɨ.

⁸ Peeka jare peikuaa, ikavi ko yandeYa. ¡Oyerovia yae ko kuimbae, jese oyeko vae!

⁹ Peñeñono tee Tumpa pe vae reta, peipoɨu yandeYa güi; echa ngaraa mbae oata oipoɨu chugüi vae reta pe.

¹⁰ Yaguapope raɨ reta pe oata mbae jare yɨmbɨaɨ; ërei ngatu yandeYa oeka vae reta pe, ngaraa oata mbae ikavi vae.

¹¹ Peyu cheraɨ reta, peyeapɨsaka cheré; pomboeta peipoɨu yandeYa güi.

¹² ¿Kia nunga kuimbae pa oipota oikove oiko? ¿Jeta ara oipota oiko, oecha vaerä mbae ikavi vae?

¹³ Eroyeandu nekü ikavimbae güi, jare ndeyuru mborombotavɨ güi.

¹⁴ Eyembosɨrɨ ikavimbae güi, jare eyapo ikavi vae; eeka mbɨakatu, jare eiko avei mbɨakatu rupi.

¹⁵ YandeYa oyangareko jupi vae reta re, jare oyeapɨsaka avei oï isapúkai reta re.

¹⁶ YandeYa iyarasɨ ikavimbae oyapo vae reta kotɨ, omboai vaerä ɨvɨ güi jee reta.

¹⁷ Jupi vae reta osapúkai, jare yandeYa oendu; jare oepɨ opaete ipɨatɨtɨ güi.

¹⁸ YandeYa köiño oï ipɨatɨtɨ yae vae reta güi; jare oepɨ ipɨatɨtɨ yae vae reta.

¹⁹ Jupi vae, jeta yae ko iyemoambeko reta, ërei ngatu opaete kuae reta güi yandeYa oepɨ.

²⁰ Jae oñovatu opaete ikägüe reta; metei ave ikägüe ngaraa oñemopë.

²¹ Jeko ae oyukata jeko kavimbae; jupi vae imotareɨa reta oiporara yaeta.

²² Ërei yandeYa güɨroasayepe jembiokuai reta jekove, ¡ngaraa oiporara jese oyeko vae reta!