SALMOS 33 - Biblia Guarani Tumpa Iñee

SALMO 33 Mbaemboete opaete mbae Iyapoa jare Iyangarekoa pe

¹ Jupi vae reta, peyerovia yandeYa re, ipɨa jupi vae reta ikavi yae ko ombaemboete yave.

² Peräsémbai pesapúkai yandeYa pe, tembiporu tairari pegua arpa ipu ndive, ngitara ndive jare arpa rami vae ndive.

³ Petairari chupe, tairari ipɨau vae pe, ¡pembaembopu kavi chupe yerovia katu reve!

⁴ Echa yandeYa iñee añete ko; opaete jembiapo reta omboyekuaa iñee añete vae.

⁵ Jae oaɨu jupi rupi kavi jare isɨmbi rupi oyeapo vae, iporoparareko tɨnɨe opaete ɨvɨ.

⁶ YandeYa oyapo ara reta iñee peño, ipɨ̈túe peño oyapo opaete ara ipo reta.

⁷ Jae omboatɨ ɨ reta ɨguasurä, oñono jenda pe ɨguasu reta tɨpɨ yae vae.

⁸ Toipoɨu yandeYa güi opaete ɨvɨ pegua, toipoɨu chugüi opaete ɨvɨ pegua reta.

⁹ Echa jae jei vae, opaete oyeapo; omee mborookuai vae, jökorai oiko.

¹⁰ YandeYa güɨrokomegua tëtaguasu reta oyemongeta tëi oyapo vaerä vae, güɨrokomegua tëta reta iyemongeta,

¹¹ ërei yandeYa iyemongeta, oikota jekuae avei.

¹² Oyerovia ko tëtaguasu, iTumpa jae ko yandeYa vae, jae oiparavo imbaerä vae.

¹³ YandeYa omae ara güi, jae oecha opaete vae reta.

¹⁴ Jae oikoa güi omae, opaete ɨvɨ pegua reta re.

¹⁵ Jae ko oyapo opaete vae reta ipɨa, jae oikuaa opaete vae jembiapo reta.

¹⁶ Mburuvicha guasu mbaetɨ ko oyereroasayepe jeta sundaro güɨnoi ramo, ani jëia yae vae mbaetɨ ko ojoyepe ipɨ̈rata yae jeko pegua;

¹⁷ kavayu mbaetɨ ipuere oporogüɨroasayepe; yepe tëi ipɨ̈rata yae.

¹⁸ YandeYa oyangareko oipoɨu chugüi vae reta re, oäro iporoparareko re vae reta,

¹⁹ güɨroasayepe vaerä jekove mano güi, omee vaerä oikoveño oiko karuai iara pe.

²⁰ Ore royeko yandeYa re; ¡jae oremborɨ jare oreangareko!

²¹ Jáeramo royeroviata jese, echa royeko yae jee ikɨambae re.

²² ¡Ndeporoparareko, toiko ore ndive, oreYa, roäro nderé rami!