SALMOS 31 - Biblia Guarani Tumpa Iñee

SALMO 31 Mborogüɨrovia katu Tumpa re vae

¹ CheYa Tumpa, ndereño ayeko, ¡agüɨye etei tañemomaraiuka! ¡Chereepɨ, echa nde ko jupi vae!

² Emboɨke ndeapɨsa eyeapɨsaka cheré; chereroasayepe jarembaeño. Ita guasu rami eï cheve, ñepɨ̈roa chereroasayepe vaerä.

³ ¡Nde ko jae ita guasu rami cheve vae, jare cheñepɨ̈roa! ¡Chereroata, cheangareko; nderee imboetea yae jeko pegua!

⁴ ¡Cherenoe ñuai oñono reta cheve vae güi, echa nde ko jae cheñepɨ̈roa!

⁵ Añono cherekove ndepo pe, ¡nde chereepɨ cheYa, Tumpa añete vae!

⁶ Aröɨro tumpa-raanga imboetea reta, ërei che ndereño ayeko.

⁷ Avɨakatuta, ayeroviata ndeporoparareko re, echa remae chepɨatɨtɨ re, reikuaa aiporara aï vae reta.

⁸ Mbaetɨ chemee tovaicho reta ipo pe; echa cheñono jëguambaea pe.

⁹ Cheparareko cheYa Tumpa, echa mbɨatɨtɨ pe aï. Mbɨatɨtɨ chembopɨtu, ¡opaetei cherete jëogüe!

¹⁰ ¡Echa mbɨatɨtɨ chembopaa chereraja! Chepɨ̈rata opa ma cheyoa jeko pegua, ¡cherete mbaetɨ ma ipuere!

¹¹ Opaete cherovaicho reta cheyóyai yóyai, cherëta-ɨpɨ pegua reta omondo ete yé, chekuaa vae reta okɨɨye chegüi, ¡ikatu rupi chereecha vae reta otekuarai chegüi!

¹² Oñemoakañɨ chegüi reta, omano ma vae güi iñakañɨ rami. Ayu apɨta metei kopa oyeka ma vae rami.

¹³ Echa jeta vae güi aendu ndaye reta chekotɨ, oipota rupi güi chemongɨɨye. Metei rami oyemongeta reta oyapo vaerä ikavimbae cheve, ¡oyemongeta reta cheyuka vaerä!

¹⁴ Ërei che ndereño ayeko cheYa Tumpa, jae: “¡Nde ko jae cheTumpa!”

¹⁵ Ndepo pe ko oï aikove aiko vae, chereepɨ cherovaicho reta güi jare chepïaro vae reta güi.

¹⁶ Emae ndepɨakatu reve che nderembiokuai re, ndeporoparareko rupi chereroasayepe.

¹⁷ Agüɨye tañemomaraiuka cheYa Tumpa, echa che ayerure ndeve. Toñemomaraiuka iyoa vae reta, kïrii ngatuño etei toñogüɨnoi omanogüe reta ñogüɨnoia pe.

¹⁸ Kïrii topɨta iyapu vae reta, oasa ete jasɨ katu jei jupi vae reta kotɨ vae, ipɨapochɨ jare oporomotareɨ reve.

¹⁹ ¡Tuicha yae ko ndepɨakavi, oipoɨu ndegüi vae reta kotɨ! Kuimbae reta jovake remee nderé oyeko vae reta pe.

²⁰ Nde reï jae reta ndive vae rupi reroasayepe oporomomburu vae reta güi; reñono reta ndero guakapi pegua pe rami, jovaicho reta iporoangao güi.

²¹ Toyemboete cheYa, echa jae oyapo mɨakañɨ cheve iporoparareko rupi, tëta guasu jëguambaea pe.

²² Jarembae voi jae: “Ayemombo ma Tumpa jóvai güi, ërei nde reendu cheyerure, asapúkai ndeve yave.”

²³ Opaete, pe jupi vae reta, peaɨu yandeYa. Jupi vae reta re yandeYa oyangareko, ërei oiporarauka oyembotuicha reve mbae oyapo vae pe.

²⁴ Peñemomɨ̈rata opaete yandeYa reño peyeko vae reta, peñemoäta ngatu pepɨa pe.