SALMOS 30 - Biblia Guarani Tumpa Iñee

SALMO 30 Mbaemboete yandeYa oporogüɨroasayepe vae pe

¹ CheYa Tumpa, romboeteta, echa nde chereepɨ, mbaetɨ remaeño cherovaicho reta cheyóyai yóyai.

² CheYa Tumpa, aiporu yemborɨ ndeve, jare chembogüera;

³ cheYa Tumpa, nde cherenoe omanogüe reta ñogüɨnoia güi; remee cheve tekove, agüɨye vaerä aja tɨvɨa pe.

⁴ Pe jupi vae reta, petairari yandeYa pe, ¡pemboete jee ikɨambae!

⁵ Echa jae iyarasɨ michi peguaño ko, ërei jae ipɨakavi mbaetɨ opa chugüi. Pɨ̈tu yave ou yaeo, ërei ndeimbove yave outa yerovia katu.

⁶ Aiko pɨagüive kavi yave jae cheyeupe: “Ngaraa etei kia ipuere chemomɨi.”

⁷ Echa nde cheYa, ndepɨakavi rupi chemomɨ̈rata ɨvɨtɨ rami, ërei resɨrɨ chegüi yave, chepɨa jopa apɨta.

⁸ CheYa, ndeveño aekata yemborɨ, ndeveño ayerureta.

⁹ ¿Mbaerä yé pa asiriveta ndeve amano yave, aja yave tɨvɨa pe? ¡Ɨvɨkúi ngaraa ma ipuere ndemboete, ngaraa ma ipuere omoërakua neñee!

¹⁰ CheYa Tumpa, eyeapɨsaka cheré, cheparareko; ¡chemborɨ cheYa!

¹¹ Chepɨatɨtɨ reipoepɨ cheve yerovia katu pe, temimonde mbɨatɨtɨ pegua remboi chegüi, jare chemboemimonde yerovia katu pe.

¹² Jáeramo, atairarita ndeve mbaemboete pegua, mbaetɨta kïriiño apɨta, romboete aveita cheYa Tumpa.