SALMOS 28 - Biblia Guarani Tumpa Iñee

SALMO 28 YandeYa oendu yandeyerure

¹ CheYa Tumpa, ndeveño asapukaita; ita guasu cheñepɨ̈roa, eendu chesapúkai, echa mbaetɨ yave reendu cheyerure, omano vae reta rami ma ko aï.

² Eendu romoñera vae, asapúkai ndekotɨ yave, chepo aupi ndetupao oñeñono tee vae kotɨ yave.

³ Agüɨye chereraja jeko pɨ̈chɨi vae reta ndive, jupimbae vae reta ndive, jae reta imiari mbɨakatu re japicha pe, ërei ipɨa reta pe oï ikavimbae.

⁴ Eiporarauka chupe reta jembiapo oï rupi, jare jeko kavimbae oï rupi, eiporarauka chupe reta jae reta oyapo rami.

⁵ Echa mbaetɨ oyemomaendúa reta, yandeYa oyapogüe re, ¡jae topa tomokañɨtei, jare agüɨye tamaeño topüa ye!

⁶ ¡Toyemboeteuka yandeYa, oyeapɨsaka cheyerure re vae!

⁷ YandeYa jae ko cheñepɨ̈roa jëguambae jare cheyeopiaka, jese ayeko jare chemborɨ. Chemboyerovia, amboeteta tairari pe.

⁸ YandeYa jae ko imbae vae reta iñepɨ̈roa jëguambae, ñepɨ̈roa oporogüɨroasayepe vae jembiparavo peguarä.

⁹ CheYa, eroasayepe ndembae vae reta; ndeporerekua ndembae vae reta re. Eyangareko jese reta, vecha iyangarekoa oyangareko jɨmba re rami; ¡emae kavi avei jese reta!