SALMOS 25 - Biblia Guarani Tumpa Iñee

SALMO 25 David oiporu arakuaa, ñɨ̈ro jare yeangareko

¹ CheYa Tumpa, ndekotɨño che ayerure;

² cheRu Tumpa ndereño ayeko: Agüɨye emaeño tañemomaraiuka. ¡Agüɨye cherovaicho reta topuka cheré!

³ ¡Añetete, ngaraa etei oñemomaraiuka nderé oyeko vae reta! ¡Ërei oñemomaraiukata oyembopɨapochɨ jupimbae reve ndekotɨ vae reta!

⁴ CheYa Tumpa, eechauka cheve nderemimbota reta; chemboe nderemimbota re;

⁵ chemboe jare chereroata añete vae rupi, echa nde ko jae Tumpa chereepɨ vae. ¡Ndereño ko aäro opaete ara!

⁶ CheYa Tumpa, nemaendúa ndepɨakavi reta re jare ndeporoparareko reta re, kuae reta opambae ko.

⁷ Agüɨye nemaendúa chetaɨrusu yave cheyoa vae re, ayembopɨapochɨ ndekotɨ vae re; cheYa Tumpa, nemaendúa cheré, ndeporoaɨu jare ndepɨakavi renoi rupi.

⁸ YandeYa ko ipɨakavi vae jare jupi vae; jáeramo jae jemimbota oechauka iyoa vae reta pe,

⁹ jare güɨroata jemimbota rupi oñemomichi vae reta; ¡omboe jupi rupi mbaetɨ oyembotuicha vae!

¹⁰ Opaete yandeYa jemimbota ko mboroparareko jare añete vae, iporogüɨrökuavee päve jare iporookuai reta oñovatu jare oyapo vae pe.

¹¹ CheYa Tumpa, neɨ̈ro cheve cheyoa yae vae re, nderee imboetea yae jeko pegua.

¹² Kuimbae oipoɨu ndegüi vae, nde remboeta kërai oiko vaerä.

¹³ Oiko kavita, iñemuña reta güɨnoita iɨvɨ ae.

¹⁴ YandeYa oï oipoɨu chugüi reta vae ndive, chupe reta oechaukata iporogüɨrökuavee päve.

¹⁵ Jekuaeño amaeta cheYa re, echa jae cherenoeta ñuai güi.

¹⁶ CheYa, cheparareko, emae cheré, echa che aeño aï jare chepɨatɨtɨ.

¹⁷ Chepɨatɨtɨ reta oñemoïru cheve, cherenoe chugüi.

¹⁸ Emae chepɨatɨtɨ aï vae re jare aiporara aï vae re, neɨ̈ro cheve opaete cheyoa re.

¹⁹ Emae cherovaicho reta oyembojeta cheve vae re, chemotareɨasɨ yeyé ñogüɨnoi.

²⁰ ¡Eyangareko cheré jare chereepɨ! ¡Agüɨye emaeño tañemomaraiuka, echa ndereño ayeko!

²¹ Jupi jare sɨmbi rupi aiko vae tachereepɨ, echa ndereño ayerovia.

²² ¡CheRu Tumpa, eepɨ Israel iñemuña reta opaete oiporara vae güi!