SALMOS 22 - Biblia Guarani Tumpa Iñee

SALMO 22 Sapúkai mbɨatɨtɨ pegua jare tairari mbaemboete pegua

¹ CheRu Tumpa, cheRu Tumpa, ¿maera pa chereeya? ¿Maera pa mbaetɨ reyu chemborɨ? ¿Maera pa mbaetɨ reendu cheräse aï vae?

² CheRu Tumpa, ara pe asapúkai ndeve, ërei mbaetɨ reendu cheve, pɨ̈tu yave mbaetɨ chepuere aputuu.

³ Ërei nde ko iyoambae, nde ko Israel iñemuña reta ndemboete vae.

⁴ Oreñemuñagüe reta oyeko nderé, oyeko reta nderé jare nde reyora.

⁵ Osapúkai reta ndeve yave reyora, oyeko reta nderé jare mbaetɨ oñemomaraiuka reta.

⁶ Ërei che ko taso rami, mbaetɨ ma kuimbae rami; ¡cheyóyai yóyai kuimbae reta, chemotareɨ opaete vae reta!

⁷ Opaete chereecha vae cheyóyai yóyai, iyuru ambuae jare oñeäkambovava omae cheré.

⁸ Jei reta: “Tumpa pe ko oñemee, jae toepɨ. Echa oyerovia yae jese, togüɨroasayepe añave.”

⁹ Ërei nde ko remee aa vaerä chesɨ jɨe güi, nde ko cheangareko akambu güive.

¹⁰ Chesɨ jɨe peve cheangareko, chesɨ jɨe peve nde ko jae cheTumpa.

¹¹ Agüɨye esɨrɨ chegüi, echa tembiporara köi yae oï chegüi, jare mbaetɨ kia chemborɨ vaerä.

¹² Cherovaicho reta cheöva jeta toro rami, Basán pegua toro pochɨ jare ipɨ̈rata vae rami.

¹³ Yaguapope pochɨ oñee vae rami, oyurupeka oporepeña reta cheré.

¹⁴ Aiko ɨ oyepɨyere vae rami; mbaetɨecha chekägüe iyoapɨa. Chepɨa iraitɨ rami, ochɨrɨrɨecha cheɨvɨte pe.

¹⁵ Cheyuru otini takɨpe rami, chekü oya cheäpeku re; ¡nde cheñono amano vaerä!

¹⁶ Echa yaɨmba reta rami cheöva reta, jeta jeko kavimbae reta cheöva; omombu reta chepo jare chepɨ.

¹⁷ ¡Chepuere aipapa opaete chekägüe chepiru ramo! Jökorai ramboeve jae reta omae ñogüɨnoi cheré;

¹⁸ omboyao reta oyoupe cheremimonde; jare cheremimonde re oyombosuerte reta.

¹⁹ Ërei ngatu, nde cheYa chemomɨ̈rata vae, ¡agüɨye esɨrɨ! ¡Jarembaeño eyu chemborɨ!

²⁰ Chereepɨ kɨsepuku güi, chereepɨ kuae yaɨmba reta imbaepuere güi.

²¹ Chereroasayepe yaguapope iyuru güi, ¡jare chereepɨ toro pochɨ vae reta güi!

²² Amoërakuata nderee cherëtara reta pe; ndembae vae reta oyemboatɨa pe romboeteta.

²³ Pemboete yandeYa, pe peipoɨu chugüi vae reta, ¡opaete pe Jacob iñemuña reta, pemboete yandeYa! ¡Peipoɨu chugüi, opaete pe Israel iñemuña reta!

²⁴ Echa jae mbaetɨ güɨröɨro ani omaeiño paravete vae reta oiporara vae re. Mbaetɨ oñemi chugüi reta, ¡jae oendu chupe reta, oeka reta iporomborɨ yave!

²⁵ Jeta yae vae ndembae vae reta oyemboatɨ vae jovake, romboeteta; añererökuavee amee vaerä ndeve vae ayapota, oipoɨu ndegüi vae reta jovake.

²⁶ Okaruta yogüɨrekoasɨ katu vae reta, jɨ̈vɨata regua; yandeYa oeka vae reta, omboeteta, jare yogüɨrekopukuta.

²⁷ Imaendúa retata jare yogüeruta yandeYa kotɨ, opaete ɨvɨ pegua reta, opaete tëtara ñavo tëtaguasu reta pegua; ¡ombaemboete retata!

²⁸ Echa yandeYa mburuvicha guasu ko, jae oporookuaita opaete tëtaguasu reta re.

²⁹ Okaru retata jare omboete retata, opaete oikokatu vae reta; oyetavatɨka retata jóvai, opaete ojota ɨvɨkuirä vae, mbaetɨ ipuere iyeugüi aeño oikove vae reta.

³⁰ Taɨkuegua reta oyeokuaita chupe, jae reta imiarita yandeYa re taɨkuegua ñemuña reta pe.

³¹ Omoërakuata tëta oimeta vae reta pe, Tumpa jupi vae re jare jembiapo re.