SALMOS 21 - Biblia Guarani Tumpa Iñee

SALMO 21 Mbaemboete oyereroasayepe tovaicho güi ramo

¹ CheYa Tumpa, mburuvicha guasu oyerovia ndembaepuere re, ¡oyerovia, echa remborɨ oporomoamɨri!

² Remee chupe ipɨa pe oipota vae, neäteɨä remee chupe oiporu ndeve vae.

³ Echa reë reövaiti ndeporerekua ikavi vae ndive, äka-regua oro ikɨambae reñono iñäka re.

⁴ Tekove oiporu ndeve jare remee chupe; oikopuku vaerä jekuae avei pegua.

⁵ Iyemboetea tuicha, ndeporomborɨ rupi, remee chupe oyemboeteuka yae vaerä.

⁶ Echa ndeporerekua jese jekuae avei pegua, remboyerovia, echa reï jae ndive.

⁷ Echa mburuvicha guasu oyeko yandeYa reño, Tuichagüe yae ete vae iporoparareko rupi ngaraa kia ipuere jese.

⁸ Ndembaepuere oupitɨta opaete nderovaicho reta; ndepo ndeakatu kotɨgua oupitɨta nemotareɨ vae reta.

⁹ Horno jaku yae vae rami reñonota ndearasɨ iara pe. Ndearasɨ pe remboaita, tata pe remokañɨteita.

¹⁰ Taɨ reta remokañɨteita ɨvɨ güi, jare iñemuña reta kuimbae reta ipɨte güi.

¹¹ Echa oipota tëi oyapo reta ikavimbae vae ndeve, oyomboemboe reta, ërei ngaraa ipuere reta.

¹² Nde rembotekuarai retata, nderuvɨ rejäata ikotɨ reta.

¹³ ¡Emboyekuaa ndembaepuere cheYa Tumpa! ¡Rotairarita jare romboeteta reporomoamɨri vae!