SALMOS 2 - Biblia Guarani Tumpa Iñee

SALMO 2 YandeYa jembiparavo iporookuaía

¹ ¿Maera pa pochɨ jare oyomboemboe kuimbae reta? ¿Maera pa tëtaguasu reta oyapo yemongeta ikavimbae?

² Mburuvicha guasu ɨvɨ pegua reta oñomopüa jare oyovaicho, tenondegua reta oyomboatɨ yandeYa kotɨ jare jembiparavo kotɨ, jei reve:

³ “¡Yayora jókuae oporoäpɨti pɨpe vae! ¡Yayora yandeyeugüi ñaneapɨti pɨpe vae!”

⁴ Ërei ara pe güɨnoi iporookuaía vae opuka; yandeYa oyóyai yóyai omae jese reta.

⁵ Jaɨkue rupi jae omomiari iyarasɨ reve, iyarasɨ pe omongɨɨye.

⁶ Jei: “Ërei che amboguapɨ mburuvicha guasu Sión re, ɨvɨtɨ chembae oï tee vae re.”

⁷ Che amoërakuata yandeYa jei vae; yandeYa jei cheve: “Cheraɨ ko nde; che ko romoñemuña añave.

⁸ Eiporu cheve tëtaguasu reta ndembaerä, jare che tamee ndeve; jare toiko ndembaerä opaete ɨvɨ iyapɨ rupi.

⁹ Remoamɨrita mbaepuere yae rupi, ¡mbaerɨru ñaeu pegua rami remonguruvita!”

¹⁰ Añave, mburuvicha guasu reta; pearakuaa katu peyeupe; oporojäa ɨvɨ pe vae reta, peendu yemboarakuaa.

¹¹ Peyeokuai yandeYa pe peipoɨu reve, jare peyerovia pemboete reve.

¹² Pemboete Taɨ, agüɨye vaerä iyarasɨ, jare opa pemano; echa aramoete pegua iyarasɨ. ¡Toyerovia katu opaete jese güɨrovia vae!