SALMOS 19 - Biblia Guarani Tumpa Iñee

SALMO 19 Tumpa iñee jare jembiapo reta

¹ Ara oikuaauka Tumpa iyemboetea, ara ipo reta oikuaauka Tumpa jembiapo.

² Ara reta jare pɨ̈tu reta oikuaauka vi oyoupe jókuae.

³ Mbaetɨ kia jei ñee, mbaetɨ vi oyeendu ñee.

⁴ Ërei jërakua opaete ɨvɨ rupi, oupitɨ opaete ɨvɨ iyapɨ rupi. Jese oñono kuaraɨ jendarä.

⁵ Jare kuaraɨ, omenda ramo vae jo güi oë rami, oñoñókuai vae oyerovia reve osɨi vae rami.

⁶ Araɨpɨ kotɨ güi ko oë, jare ojo oike jovaicho kotɨ, jare mbaetɨ etei oñemi jakuvogüe güi vae.

⁷ YandeYa iporookuai jupigüe ko, oporopoepɨ vae ko; yandeYa iporookuai jupi ko, arakuaa oupitɨ katumbae pe omee arakuaa.

⁸ Sɨmbi ko yandeYa iporookuai reta, oporomboyerovia vae, ikɨambae ko yandeYa iporookuai, oechauka opaete mbaembae vae.

⁹ YandeYa güi yaipoɨu vae ko ikɨambae jare jekuae avei vae; yandeYa iporookuai añete ko jare jupi ko opaete.

¹⁰ ¡Ipotaa yae ko oro güi, oasa yé ipotaa oro ikɨambae güi! ¡Jëeasɨ yae ei güi, ñana rupigua ei güi!

¹¹ Jaeramiño vi che nderembiokuai ayemboarakuaauka pɨpe; ayapo yave, chemboyekou yae.

¹² ¿Kia pa ipuereta oikuaa imbaeyoa reta? Chereepɨ mbaeyoa reta aikuaambae oï cheré vae güi.

¹³ Che nderembiokuai, cheövatu vi pɨapochɨ güi, agüɨye togüɨnoi mbaepuere cheré; jayave opaeteita chekɨambae reve aiko, jare aiko teeta chekɨambae pɨapochɨ güi.

¹⁴ Ñee reta ikavigüe toë cheyuru güi, jare chepɨa güi cheyemongeta oë vae nderóvai, cheYa Tumpa, ita guasu cheñepɨ̈roa, chereepɨ vae.