SALMOS 18 - Biblia Guarani Tumpa Iñee

SALMO 18 Yasoropai oñemee oporomoamɨri vae re

¹ ¡Roaɨu, cheYa Tumpa! Chepɨ̈rata nderé vae.

² CheYa, ita guasu cheñepɨ̈roa, cheñepɨ̈roka, chereroasayepe vae; cheTumpa, chepɨ̈rata nderé vae, ndereño ayeko vae, cheyeopiaka, mbaepuere chereroasayepe vae, cheñemía ɨvate yae vae.

³ Romboeteta cheYa, jupi ko reyemboeteuka vaerä, nde chereroasayepeta cherovaicho reta güi.

⁴ Mano chemama rami jɨmasa pe; ¡oporomokañɨtei vae imbaepuere chemongɨɨye yae!

⁵ Omanogüe reta ñogüɨnoia, chemama rami jɨmasa pe, oñono reta ñuai mano pegua cheve.

⁶ Chepɨatɨtɨ aï yave aenɨi cheYa, asapúkai cheTumpa pe, jae oendu cheñee itupao güi. ¡Chesapúkai ojo oväe jae oïa pe, jare oendu!

⁷ Jayave ɨvɨ okana: Ɨvɨtɨ guasu reta iguapɨka okana, yandeYa iyarasɨ omokana.

⁸ Tätati oë iñäpɨgua rupi, tata oporomokañɨtei vae oë iyuru güi, tätapɨi jendɨ vae oë chugüi.

⁹ Ara reta omoɨ̈vɨi iyeupe jare ogüeyɨ. Oyembopɨtumimbi jae ipɨ igüɨ pe.

¹⁰ Opo metei araɨgua querubín re jare oveve, oveve ɨvɨtu re.

¹¹ Iñemikarä oñono pɨtumimbi, oñemoi pɨpe asoya pe rami, amapɨtu reta jüu ama okɨta vae rami.

¹² Jae jembipeasɨ overa iamapɨtu re; amandau jare tätapɨi jendɨ vae oë iamapɨtu güi.

¹³ YandeYa ombou iñee ara kotɨ güi, Tuichagüe yae ete vae omoë iñee; amandau jare tätapɨi jendɨ vae rami.

¹⁴ Ojäa juvɨ jare opa omoai moai tovaicho reta, ombou ama-tiriri jare opa omokañɨtei.

¹⁵ Oyekuaa ɨguasu jugua, opɨta ikatu pe ɨvɨ iguapɨka reta, neñeengata rupi cheYa Tumpa, neäpɨgua rupi nepɨ̈túe remoë vae rupi.

¹⁶ Ombou ipo ɨvate güi jare chepɨɨ, cherenoe ɨ tɨpɨ güi.

¹⁷ Chereepɨ cherovaicho reta imbaepuere yae vae güi, chemotareɨ vae reta ipo güi, echa jae reta imbaepuere yae chegüi.

¹⁸ Opüa reta cheré asusere aï yave, ërei cheYa chemborɨ.

¹⁹ Cherenoe jëguambaea pe, ¡chereepɨ, echa ipɨakatu cheré!

²⁰ YandeYa omboekovia cheve jupi ayapo rupi, chereko kavi oime rupi omboekovia cheve;

²¹ echa che aiko yandeYa jemimbota rupi, ¡mbaetɨ ayembosɨrɨ mbaeyoa rupi cheTumpa güi!

²² Anoi chepɨa pe opaete iporookuai reta, ¡mbaetɨ apia cheYa iporookuai güi!

²³ Isɨmbi rupi aiko jae jóvai, añeñovatu opaete mbae ikavimbae güi.

²⁴ Jáeramo, cheYa omboekovia cheve jupi ayapo rupi, chereko kavi oime rupi omboekovia cheve.

²⁵ Iporoparareko vae pe reechaukata ndeporoparareko, isɨmbi nde, kuimbae jupi vae pe.

²⁶ Ikɨambae oiko vae pe reyeechaukata ndekɨambae, ërei mbaetɨta neɨ̈ro ipɨapochɨ vae pe.

²⁷ Echa nde reroasayepeta tëta oiporara vae, ërei remomichita oyembotuicha vae.

²⁸ Nde cheYa Tumpa remee cheve tembipe, nde remboesape cheve pɨtumimbi vae.

²⁹ Ndeporomborɨ rupi amoamɨrita tovaicho, nde ndive aasata tëta guasu ikësea.

³⁰ Tumpa jembiapo ikavigüe yae ko, yandeYa iñee ikɨambae ko. ¡Yeopiaka ko opaete güɨrovia jese vae pe!

³¹ Echa, ¿oime ye pa ïru Tumpa cheYa Tumpa güi? ¿Oime pa ïru Tumpa ipuere yandereepɨ vae?

³² Tumpa ko jae chemomɨ̈rata vae, jae ombosɨmbi chereko.

³³ Cheäkua cheapo guasukaka rami, chemopɨ̈rata jekuaeño ɨvatea rupi.

³⁴ Chembopoki ñeraro peguarä, chemopɨ̈rata amoata vaerä güɨrapa jiero iyu vae pegua.

³⁵ Remee cheve yeopiaka ndeporogüɨroasayepe pegua, ndeakatu pe cheoko, ndepɨakavi rupi chembotuicha.

³⁶ Rembopɨguasu cherape cheve, jare mbaetɨ apia chugüi.

³⁷ Aɨkuemoña cherovaicho reta yave, aupitɨ, jare opa ayuka yave ayerova ye.

³⁸ Ambopere reta yave mbaetɨ opüa ye. ¡Oa reta ɨvɨ re chepɨ igüɨ pe!

³⁹ Echa nde chemomɨ̈rata ñoraro peguarä, remomichi cherovaicho reta cheve.

⁴⁰ Rembotekuarai cherovaicho reta chegüi, amokañɨtei vaerä chemotareɨ vae reta.

⁴¹ Osapúkai reta tëi, ërei mbaetɨ kia oepɨ; yandeYa ave oenɨi reta tëi, ërei mbaetɨ oendu chupe reta.

⁴² ¡Amongúiasɨ reta ɨvɨkúi ɨvɨtu opa güɨroveve vae rami! ¡Apɨ̈ro jese reta, tape rupi tuyuapo re oñepɨ̈ro rami!

⁴³ Chereroasayepe tëta iñerarose vae güi, cheñono tëtaguasu reta itenondeguarä. Tëta aikuaambae yeokuai cheve.

⁴⁴ Oendu reta yave cheregua, oyapo reta cheporookuai, ketɨgua reta vi chemboete.

⁴⁵ Ketɨgua reta oyembopɨtu, opa ñogüɨnoe reta iñemika güi.

⁴⁶ ¡Toyemboete yandeYa! ¡Toyemboeteuka ita guasu cheñepɨ̈roa! ¡Toyembotuicha cheTumpa chereroasayepe vae!

⁴⁷ Tumpa oyepɨ aiporaragüe re vae, jare omoamɨri tëta reta cheve,

⁴⁸ chereroasayepe cherovaicho reta güi vae, jae jekuae chemopüa ou cheve vae reta re, chereepɨ kuimbae ipɨarai vae reta güi.

⁴⁹ Jáeramo, cheYa Tumpa toromboete opaete vae tëtaguasu reta jóvai tatairari ndeve.

⁵⁰ Omee che jembiparavo mburuvicha guasu pe, tuicha rupi aporomoamɨri vaerä, jare mboroparareko, che David jare cheñemuña reta pe jekuae avei pegua.