SALMOS 148 - Biblia Guarani Tumpa IñeeSALMO 148 Yemboarakuaa opaete Tumpa jembiapo reta peguarä 1 ¡Pemboete yandeYa ara güi! ¡Pemboete yandeYa ɨvate güi! 2 ¡Pemboete yandeYa, pe opaete iaraɨgua reta! ¡Pemboete yandeYa, pe opaete ara pe peï vae reta! 3 ¡Kuaraɨ jare yasɨ, pemboete yandeYa! ¡Opaete yasɨtata jembipeasɨ vae reta, pemboete yandeYa! 4 ¡Pemboete, pe ara reta ɨvate yeyé peï vae, jare nde ɨ, reï ara re vae! 5 Pemboete yandeYa jee, echa jae jei vae rupi, opaete mbae oyeapo vae; 6 jae oyapo opaete mbaembae jekuae avei pegua, jare oñono chupe reta mborookuai ngaraai oyepoepɨ vae. 7 ¡Pemboete yandeYa ɨvɨ güi, mbaeporou ɨguasu rupigua reta, jare ɨ rugua tɨpɨ yae vae vi! 8 ¡Ama-tiriri jare amandau, iroɨ jare ɨ̈vɨti! ¡Ama ɨvɨtuai reve vae, oyapo Tumpa jei vae! 9 ¡Ɨvɨtɨ jare ɨvɨtɨ guasu reta! ¡Opaete ɨvɨra ia yau vae reta jare opaete ɨ̈vɨrare reta! 10 ¡Mɨmba ñana rupigua reta jare mɨmba tëta rupigua reta! ¡Mɨmba ipɨtía re oguata vae reta jare güɨra reta! 11 ¡Mburuvicha guasu reta ɨvɨ pegua jare opaete tëta reta! ¡Opaete mburuvicha reta jare mburuvicha oporojäa kuae ɨvɨ pe vae reta! 12 ¡Kunumi reta, jare kuñatai reta vi, ndechi reta jare michia reta! 13 ¡Pemboete yandeYa jee, echa jae jeeño ko tuicha yae vae! ¡Iyemboetea tuicha yae, oyapɨraa opaete ara jare ɨvɨ! 14 ¡Jae ko ombotuicha yae tëta imbae vae imbaepuere! ¡Pemboete yandeYa, opaete imbae vae reta, pe Israel iñemuña reta! ¡Pe köiño peï chugüi vae reta! ¡Aleluya! |
Biblia DC Guaraní Bolivia © Bolivian Bible Society, 2001.
Bolivian Bible Society