SALMOS 147 - Biblia Guarani Tumpa Iñee

SALMO 147 Mbaemboete Tumpa ipɨakavi Jerusalén re vae

¹ ¡Pemboete yandeYa! ¡Ikavi ko yatairari vaerä salmo reta ñaneTumpa pe! Echa ikavi jare ipöra yae ko ñamee mbaemboete chupe vae.

² YandeYa omopüa pɨau ye Jerusalén; güeru yeta Israel iñemuña reta opa iɨvɨ güi oyererajagüe.

³ Jae ombopɨakatu ipɨatɨtɨ vae reta, jare oipoano ipere reta.

⁴ Jae oipapa yasɨtata reta, jare metei metei ñavo ombojee.

⁵ Tuicha yae ko yandeYa, jare imbaepuere yae, iyarakuaa yamboapɨ rapeä etei.

⁶ YandeYa ombotuicha oñemomichi vae reta, jare omoñemomichi iyoa vae reta.

⁷ Petairari yandeYa pe, tairari mbaemboete pegua, petairari ñaneTumpa pe arpa ndive.

⁸ Jae ko oyasoi ara amapɨtu pe, jae ko oñono kavi ama okɨ vaerä ɨvɨ re, jae ko ombokuakuaa ñana ɨvɨtɨ guasu reta re.

⁹ Jae ko omongaru mɨmba reta, omongaru chucha imembɨ reta oñee yave yɨmbɨaɨ güi.

¹⁰ Kavayu reta ipɨ̈rata, mbaetɨ omboyerovia yandeYa, ani kuimbae reta isɨrɨkɨ, mbaetɨ vi omboyerovia.

¹¹ YandeYa omboyerovia oipoɨu chugüi vae, jare oäro iporoparareko re vae.

¹² Jerusalén pegua reta, pemboete peYa, Sión pegua reta, pemboete peTumpa.

¹³ Echa omotäta neröke reta imotätaa, nderapɨpe yogüɨreko vae re iporerekua.

¹⁴ Jae güeru mbɨakatu ndeve, omee ndeve jeta trigo ikavigüe.

¹⁵ Jae ombou iñee ɨvɨ pe, jarembae pegua oñemoai iñee.

¹⁶ Omee oa iroɨ vecharaagüe rami, morotï omoai tanimbu rami.

¹⁷ Oitɨ iroɨ amandau rami, jókuae iroɨ ombou vae, ¿kia pa güɨropɨata?

¹⁸ Ombou iñee yave tɨkui, ɨvɨtu ombou yave oipeyu, jare ɨ oë chugüi.

¹⁹ Jae oikuaauka iñee, iporookuai reta jare iporojäa reta, tëta Israel, Jacob iñemuña reta pe.

²⁰ Mbaetɨ etei jökorai oyapo ïru tëtaguasu reta ndive; jae reta mbaetɨ oikuaa yandeYa iporookuai reta re. ¡Aleluya!