SALMOS 146 - Biblia Guarani Tumpa Iñee

SALMO 146 Mbaemboete jupi ko Tumpa vae re

¹ ¡Tamboete cheYa opaete cherekove ndive!

² YandeYa pe tatairari aikove aiko ramboeve; cheTumpa pe atairarita salmo, aikove aiko ramboeve.

³ Agüɨye peyeko mburuvicha reta re, ani oipotagüe kuimbae re, ngaraa ko ipuere oporogüɨroasayepe.

⁴ Echa omano yave ojo ye ɨvɨkuirä, jare jókuae ara voi opa iyemongeta reta.

⁵ Oyerovia ko jókuae, Jacob iTumpa iporomborɨ güɨnoi vae, iporoäro güɨnoi yandeYa, Jacob iTumpa re vae,

⁶ jae ko oyapo ara jare ɨvɨ, ɨguasu jare opaete pɨpe yogüɨreko vae. Jae mbaetɨ oipoepɨ jeigüe.

⁷ Oyapo jupi vae oiporara vae reta pe, omongaru yɨmbɨaɨ vae reta. YandeYa oyora tembipɨɨrä yogüɨreko vae reta;

⁸ omomae jesambae vae reta, omopüa ogüɨapi vae reta, oaɨu jupi rupi yogüɨreko vae reta.

⁹ YandeYa oyangareko ketɨgua reta re, tɨ̈reɨ re jare imemano vae re, ërei jupimbae reta ombojopa.

¹⁰ Sión, neTumpa oporookuaita jekuae avei rupi, yandeYa oporookuaita jekuae avei rupi. ¡Aleluya!