SALMOS 145 - Biblia Guarani Tumpa Iñee

SALMO 145 Mbaemboete Tumpa ipɨakavi re jare imbaepuere re

¹ Torombotuicha cheTumpa, cheruvicha guasu, amboeteta nderee jekuae avei rupi.

² Ara ñavo toromboete, amboeteta nderee jekuae avei rupi.

³ CheYa, ndembaepuere yae ko, jupi ko reyemboeteuka yae vaerä, ndembaepuere roipapa rapeä ko.

⁴ Nderembiapo reta, oyemboeteta jekuae avei rupi, oñemoërakuata ndembaepuere rupi reyapo vae.

⁵ Ndeyemboetea ipöra yae vae re, jare mɨakañɨ tuichagüe reyapo vae re che ayemongetata.

⁶ Kuimbae reta imiarita opaete mbaravɨkɨ tuichagüe reyapo vae re. Che amoërakuata ndembaepuere re.

⁷ Omoërakuata imaendúa reta reve ndepɨakavi yae vae re, jare otairari retata nde ko jupi vae re.

⁸ YandeYa iyeaeä vae jare iporoparareko vae ko, jae mbaetɨ iyarasɨ raivi vae ko, iporoparareko yae vae ko.

⁹ Ipɨakavi ko yandeYa opaete vae pe, iporoparareko yae opaete jembiapo reta re.

¹⁰ ¡CheYa Tumpa, tandemboete opaete nderembiapo reta! ¡Tandemboete ndembae vae reta!

¹¹ Timiari reta ndeyemboetea ikavi yae ndeporookuaía pe vae re, tomoërakua reta ndembaepuere.

¹² ¡Toikuaauka ndembaepuere kuimbae reta pe, jare ndeyemboetea ikavi yae ndeporookuaía pe vae re!

¹³ Ndeporookuaía opambae ko, ndembaepuere jekuaekuae avei vae ko.

¹⁴ YandeYa omborɨ opaete ogüɨapi vae, jare omopüa opaete oiporara vae reta.

¹⁵ Opaete vae ndereño oäro, nde remee jembiurä iara pe kavi.

¹⁶ Ndepo reyora, ndepɨa kavi reve ndeporerekua opaete oikove vae re.

¹⁷ Jupi ko yandeYa opaete oyapogüe rupi, iporoparareko opaete oyapogüe rupi.

¹⁸ YandeYa köiño oï oenɨi vae güi, opaete añetete oenɨi vae güi.

¹⁹ Oipoɨu chugüi vae jemimbota ombopota, oenduta vi isapúkai, jare güɨroasayepeta.

²⁰ YandeYa oñovatu, opaete güɨnoi mboroaɨu ikotɨ vae reta, ërei omokañɨteita opaete iyoa vae reta.

²¹ ¡Che amboeteta yandeYa! ¡Opaete vae tomboete yandeYa jee ikɨambae, añave güive jekuae avei rupi!