SALMOS 144 - Biblia Guarani Tumpa Iñee

SALMO 144 Mburuvicha guasu oyapo yasoropai Tumpa pe

¹ Mbaemboete toiko ndeve cheYa, ita guasu cheñepɨ̈roa; jae chembopoki añoraro vaerä ñeraroa pe.

² Cheparareko vae, cheñepɨ̈roa, chepɨ̈rata nderé vae, chereroasayepe vae, cheyeopiaka, jese ayeko vae, jae oñono opaete cherëtaɨgua reta chembaepuere igüɨ pe.

³ CheYa Tumpa, ¿mbae pa ko kuimbae, reyemongeta vaerä jese? ¿Mbae pa ko kuimbae, reaɨu yae vaerä?

⁴ Kuimbae mbaeä etei ko; jekove, küaraɨa oasa vae ramiño ko.

⁵ CheYa Tumpa, emoɨ̈vɨi ndeara javoi egüeyɨ, egüeyɨ ɨvɨtɨ reta re, jare tijätati.

⁶ Embou ama-vera reta, opa emboai, embou nderuvɨ reta, opa embotekuarai nderovaicho reta.

⁷ Embou ndepo ɨvate güi, chereroasayepe jare cherenoe ɨguasu güi, ketɨgua reta imbaepuere güi,

⁸ jókuae iyapu vae reta güi, oñererökuavee oporombotavɨ reve vae güi.

⁹ CheRu Tumpa, atairarita ndeve tairari ipɨau vae pe; arpa payandepo iïcha vae ndive atairarita ndeve.

¹⁰ Nde ko remee mburuvicha guasu reta oporomoamɨri vaerä, reepɨ ko nderembiokuai David, kɨsepuku ikavimbae vae güi.

¹¹ Chereepɨ jare chereroasayepe ketɨgua reta imbaepuere güi, iyapu vae reta güi, oñererökuavee oporombotavɨ reve vae güi.

¹² Oreraɨ reta, tokuakuaa ɨvɨra okuakuaa ramo vae rami, orerayɨ reta, okɨta oñeopa kavi mburuvicha guasu jo regua rami.

¹³ Oreavatío reta, titɨnɨe oipotagüe temitɨ jäi pe, orerɨmba reta toñemuña jeta yeyé ñuu rupi.

¹⁴ Oregüeye reta tijäta ngatu mbaravɨkɨ peguarä; agüɨye topüa oreré vae, ani torereraja vae, agüɨye toyeendu sapúkai kɨɨye pegua orerokaguasu reta rupi vae.

¹⁵ ¡Oyerovia ko tëta jökorai oiko vae! ¡Oyerovia ko, tëta iTumpa jae ko yandeYa vae!