SALMOS 143 - Biblia Guarani Tumpa Iñee

SALMO 143 Yerure yeyora regua

¹ CheYa Tumpa, eendu cheyerure, eyeapɨsaka cheré, ¡emboyevɨ cheve cheyerure, nde ko añete vae jare jupi vae!

² Agüɨye chejäa cheYa, echa mbaetɨ eteita ko kia oyembojupi nderóvai.

³ Cherovaicho reta oipota cheyuka, chemomichi yae reta; chemondo aiko pɨtumimbía rupi, ɨma ma omanogüe vae reta rami.

⁴ Chepɨatɨtɨ yae aï; chepɨaä yae aï.

⁵ Chemaendúa arakae ara reta oasagüe re, ayemongeta opaete nderembiapo reta re, ndembaepuere pe reyapo vae re.

⁶ Amopüa chepo ndekotɨ, roeka, ɨvɨ otini yae vae oeka ɨ rami.

⁷ CheYa Tumpa, emboyevɨ cheve jarembae cheyerure, echa amanota ma, agüɨye esɨrɨ chegüi, agüɨye taiko omanogüe reta tɨvɨa pe ojo rami.

⁸ Ndeimbove yave eikuaauka cheve ndeporoparareko, echa ndereño ayeko. Eikuaauka cheve kërai aiko vaerä, echa ndeveño ayerure.

⁹ CheYa Tumpa chereepɨ cherovaicho reta güi, echa nde ko jae cheñepɨ̈roa.

¹⁰ Chemboe tayapo nderemimbota, echa nde ko jae cheTumpa, ¡ndeespíritu tachereraja sɨmbi rupi kavi!

¹¹ Cheya Tumpa, nderee ae re emee tekove cheve, nde ko jupi vae, ¡cherenoe mbɨatɨtɨ güi!

¹² Ndeporoparareko rupi, ¡emokañɨtei cherovaicho reta! ¡Emokañɨtei opaete cherovaicho reta, echa che nderembiokuai ko!