SALMOS 142 - Biblia Guarani Tumpa Iñee

SALMO 142 Morojäa pɨte pe yemborɨ oyeporu vae

¹ Cheñeeäta reve ayerure yandeYa pe, cheñeeäta reve aiporu chupe iporoparareko.

² Jae jóvai añono cheñeapo, jae jóvai amboyekuaata chepɨatɨtɨ.

³ Chepɨatɨtɨ yae yave, nde reikuaa ayapogüe. Jókuae tape ajaa rupi, oñono reta cheve ñuai.

⁴ Emae cheakatu kotɨ, mbaetɨ kia chemborɨ vaerä. ¡Mbaetɨ anoi kia chereepɨ vaerä! ¡Mbaetɨ kia oyemoambeko cheré!

⁵ CheYa Tumpa, asapúkai ndeve, jae: “Nde ko jae chereepɨ vae; ndeño ko reï cheveguarä.”

⁶ Eyeapɨsaka cheyerure re, echa chepɨatɨtɨ yae aï. Chereepɨ chemomburu vae reta güi, echa jae reta imbaepuere yae chegüi.

⁷ Cherenoe ayepɨɨ aï vae güi, chepuere vaerä romboete; jupi vae reta cheövata, echa nde cheparareko.