SALMOS 141 - Biblia Guarani Tumpa Iñee

SALMO 141 Yerure oime vaerä ñeñovatu ikavimbae güi

¹ CheYa, asapúkai ndeve, ¡eyu jarembae chekotɨ! ¡Eyeapɨsaka cheñee re roenɨi yave!

² Cheyeyure tojo nderóvai ikäti kavi vae incienso rami, jare chepo aupi vae, kaaru yave mbota oñemee ndeve vae rami.

³ CheYa Tumpa, eñono cheyuru iyangarekoarä; eyangareko cheyuru re.

⁴ Agüɨye emaeño tayemongeta ikavimbae re; agüɨye emaeño tayapo jupimbae iyoa vae reta ndive, agüɨye takaru jae reta ndive iarete pe.

⁵ Jaekavi ko, jupi vae oiporarauka cheve yave, omboeta cheve vae, asaite oñemokäti kavi vae ramita ko cheve, jókuae ngaraa aröɨro, ërei jókuae ikavimbae oyapo vae reta kotɨ tayerure maratu vaerä.

⁶ Juvicha reta oyeitɨukata ɨ̈vavira pe, jare oikuaa retata cheñee añetete ko vae.

⁷ Ombaeara vae ɨvɨ oara rami, ikägüe reta toñemoai tɨvɨa jöke rupi.

⁸ Jáeramo cheYa Tumpa, ndereño amae, ndereño ayeko, agüɨye chereeya.

⁹ Cheövatu ñuai oñono reta cheregua vae güi, chereepɨ iyoa vae reta iñuai güi.

¹⁰ Jupimbae reta toa iñuai pe aeño, che aja ramboeve tenonde.