SALMOS 140 - Biblia Guarani Tumpa Iñee

SALMO 140 Yerure yandeangareko pegua

¹ CheYa Tumpa, chereepɨ kuimbae jeko pochɨ vae güi; cheövatu kuimbae ipɨarai vae reta güi.

² Echa jae reta oyemongeta ipɨa pe ikavimbae re; oporomoñerarouka avei reta.

³ Oimbee reta ikü mboi rami; jare mboi imbayachi oime iyuru pe.

⁴ CheYa Tumpa, cheövatu jupimbae reta imbaepuere güi, chereepɨ ipɨarai vae reta güi, oyemongeta chererokomegua vaerä vae reta güi.

⁵ Ipɨayemboete vae reta oñono ñuai cheraperä pe, tɨmasa jare pɨsa ñuai oñono reta tape rupi cheregua.

⁶ YandeYa pe jae: “Nde ko jae cheTumpa; cheYa Tumpa, ¡eyeapɨsaka romoñera vae re!

⁷ CheYa Tumpa, chereroasayepe vae imbaepuere yae vae, nde reyangareko cheäka re ñeraroa pe.”

⁸ CheYa Tumpa, agüɨye emee iyoa vae pe ipɨa jemimbota; agüɨye emaeño toë kavi chupe iyemongeta reta, agüɨye vaerä oyembotuicha.

⁹ Opaete oyere cheré vae reta, ¡iñee ikavimbae aeño, toiporara reta!

¹⁰ Toa jese reta tätapɨi jendɨ vae, toyemombouka reta tata pe, ɨvɨkua guasu pe, mbaetɨta ma oë vae güi.

¹¹ Kuimbae iñee kavimbae vae, ngaraa oiko kavi ɨvɨ pe; jupimbae oñemokañɨteiukata ikavimbae pe.

¹² Aikuaa yandeYa oyapota jupi vae oiporara vae pe, jare mbae oata chupe vae pe.

¹³ Añetete, jupi vae reta omeeta mbaemboete ndeve, isɨmbi rupi yogüɨreko vae reta, yogüɨrekota nderóvai.