SALMOS 14 - Biblia Guarani Tumpa Iñee

SALMO 14 Kuimbae iyarakuaambae jare jeko oikomegua vae

¹ Iyarakuaambae jei ipɨa pe: “Mbaetɨ Tumpa.” Oñererokomegua reta, oyapo reta ikavimbae yae vae; mbaetɨ kia oyapo ikavi vae.

² YandeYa omae ara güi opaete kuimbae reta re, oecha vaerä oime ra kia iyarakuaa vae, oeka Tumpa vae.

³ Opaetei opia, metei rami oñererokomegua reta; mbaetɨ kia oyapo ikavi vae, mbaetɨ metei ave yepe.

⁴ ¿Mbaetɨ ra ipuere oikuaa opaete oyapogüe jupimbae ko vae? Omboendagüe oeya cherëta pegua reta kia mbɨyape jou ramiño; jókuae mbaetɨ oyerure yandeYa pe vae reta.

⁵ Orɨrɨi reta okɨɨye güi; echa Tumpa oï jupi vae reta ndive.

⁶ Paravete vae iporomboarakuaa oyóyai reta, ërei yandeYa ko jae paravete vae iyangarekoa.

⁷ ¡Mbae mona Sión güi oë Israel peguarä yereroasayepe! YandeYa oñono kavi ye ma yave teko imbae vae pe. Oyeroviata jare ovɨakatuta tëta Israel, Jacob iñemuña reta.