SALMOS 139 - Biblia Guarani Tumpa Iñee

SALMO 139 Tumpa oï opaete rupi jare oikuaa opaete mbae

¹ CheYa Tumpa, nde remae kavi cheré, jare chekuaa;

² nde reikuaa kavi opaete ayapogüe, mombɨrɨ güi nde reikuaa cheyemongeta.

³ Reikuaa opaete kërai aiko vae, ¡reikuaa opaete ayapogüe!

⁴ Ndei cheñee amoë mbove, nde cheYa, opa ma reikuaa.

⁵ Opaete cheɨ́vɨri rupi ko reï, ndeporoangareko rupi ko cherereko.

⁶ Jókuae arakuaa katu chemopɨakañɨ yae, ¡tuicha yae, mbaetɨ chepuere aikuaa!

⁷ ¿Ketɨ pa ajata ndeEspíritu güi? ¿Ketɨ pa atekuaraita ndegüi?

⁸ Ayeupi ara pe yave, joko pe reï nde; agüeyɨ omanogüe reta ñogüɨnoia pe yave, joko pe reï nde.

⁹ Aja kuaraɨ oëa kotɨ yave, ani aja aiko ɨguasu jembeɨ jovaicho pe yave,

¹⁰ joko pe ave nde cheangarekota, ¡chepokota ndeakatu pe!

¹¹ Jae yave: “¡Tañemi chugüi pɨtumimbía pe!” Pɨ̈tu ave jembipeta cheɨ́vɨri rupi.

¹² Pɨtumimbi ave mbaetɨ ipuere cheomi ndegüi, pɨ̈tu jembipe ara pe rami ndeve. ¡Pɨ̈tu jare ara oyovakeño ko ndeve!

¹³ Nde ko cheapo; nde ko cheapo chesɨ jɨe pe.

¹⁴ Romboeteta, echa tuichagüe nderembiapo reta jare oporomopɨakañɨ yae. Chepɨakañɨ yae. ¡Opaete jókuae re aikuaa kavi yae!

¹⁵ Cherete mbaetɨ oñeomi ndegüi; yepe tëi mbaetɨ kia oikuaa ayeapo vae, ayeapouka ramboeve matɨ ɨvɨgüɨ pe rami.

¹⁶ Nde chereecha ayeapo ramo etei yave; ndetupapire pe oyekuatía oï opaete jókuae, jare ou opa ma oyeapo yave, mbaetɨ etei mbae oata.

¹⁷ ¡CheRu Tumpa! Ndeyemongeta reta tuicha yae ko cheve, ¡opa rapeä ko aikuaa!

¹⁸ Aipapa yave, jeta yae ɨvɨkuitï ɨguasu jembeɨ rupigua güi; jare apa yave, jekuaeño aï nde ndive.

¹⁹ CheRu Tumpa, eyuka iyoa vae reta, embosɨrɨ chegüi oporoyuka vae reta,

²⁰ echa jei reta mbae ikavimbae ndekotɨ; nderovaicho reta oenɨi raangaiño nderee.

²¹ CheYa Tumpa, ¿amotareɨä pa nemotareɨ vae reta? ¿Jare aröɨroä pa opüa nderé vae reta?

²² ¡Amotareɨ ko opaete chepɨa ndive! ¡Añono reta ko cherovaichorä!

²³ CheRu Tumpa, emae kavi cheré, eikuaa chepɨa; chejäa, jare eikuaa cheyemongeta reta,

²⁴ emae, ¿oime ra ikavimbae cheré? Chereroata tape opambae vae rupi.