SALMOS 138 - Biblia Guarani Tumpa Iñee

SALMO 138 Yasoropai oyeapo yandeYa ipɨakavi re

¹ CheYa, romboeteta opaete chepɨa ndive, tumpa-raanga reta güi atairarita ndeveño salmo reta pe.

² Ayetavatɨkata ndetupao oñeñono tee vae kotɨ amae reve, ameeta yasoropai ndeporoparareko añete vae re, echa rembotuicha nderee jare neñee opaete mbaembae güi.

³ Roenɨi yave, nde reendu cheve, jare chemopɨ̈rata.

⁴ CheYa Tumpa, opaete mburuvicha guasu reta ɨvɨ pegua ndemboeteta, echa oendu reta neñee.

⁵ Otairari retata ndemboete cheYa, echa ndeyemboetea tuicha yae ko.

⁶ Yepe tëi mombɨrɨ ɨvate reï, reyangareko paravete vae re, ërei mombɨrɨ güi reecha ko ipɨayemboete vae.

⁷ Aiko mbɨatɨtɨ rupi yave, nde remee tekove cheve; cherovaicho reta iyarasɨ chekotɨ vae güi, nde chereroasayepe ndembaepuere pe.

⁸ ¡CheYa, rembopota ndeyemongeta cheré! CheYa Tumpa, ndeporoparareko jekuae avei pegua ko. ¡Agüɨye chereeya, che nderembiapo!