SALMOS 137 - Biblia Guarani Tumpa Iñee

SALMO 137 Tembipɨɨ reta oyaeo Babilonia pe vae regua

¹ Ɨ̈aka Babilonia pegua jembeɨ pe roguapɨ yepi, jare royaeo yepi oremaendúa yave Sión re.

² Ɨvɨra reta sauce oï tëta guasu pe vae re, opa roupi orearpa reta.

³ Tembipɨɨrä orereraja vae reta, oiporu oreve rotairari vaerä; opa mbaembae opɨ̈ro oregüi vae reta, oiporu oreve royerovia vaerä; ¡rotairari vaerä chupe reta tairari reta Sión pegua pe!

⁴ ¿Këraita ra rotairari yandeYa pegua tairari pe ketɨgua reta iɨvɨ pe?

⁵ Cheakañɨ ndegüi yave, Jerusalén, chepo cheakatu kotɨgua tijëogüe.

⁶ ¡Chekü toya cheäpeku re, mbaetɨ chemaendúa nderé yave, mbaetɨ rombotenonde nde Jerusalén opaete cheyerovia ae güi yave!

⁷ CheYa Tumpa, nemaendúa Edom iñemuña reta re, Jerusalén oyemboai yave jei reta: “¡Pemboai, pemboai iguapɨka reve!”

⁸ ¡Nde, Babilonia reyemboaiukata vae! ¡Toyerovia jókuae omboekoviata ndeve, nde reyapo ikavimbae oreve rami vae!

⁹ ¡Toyerovia jókuae oipɨɨta pemichia reta güɨrokua ɨ̈vavira re vae!