SALMOS 136 - Biblia Guarani Tumpa Iñee

SALMO 136 Mbaemboete yandeYa iporoparareko opambae vae re

¹ Pemboete yandeYa, echa jae ipɨakavi ko, echa iporoparareko jekuae avei vae ko.

² Pemboete Tumpa, tumpa-raanga reta güi imbaepuere yae vae, echa iporoparareko jekuae avei vae ko.

³ Pemboete yandeYa, imbaepuere yae ete mbaepuere güɨnoi vae reta güi vae, echa iporoparareko jekuae avei vae ko.

⁴ Pemboete mɨakañɨ tuichagüe iyapoa, echa iporoparareko jekuae avei vae ko.

⁵ Arakuaa katu rupi ara reta oyapo vae, echa iporoparareko jekuae avei vae ko.

⁶ Ɨguasu reta re oyapo ɨvɨ vae, echa iporoparareko jekuae avei vae ko.

⁷ Tembipe reta tuichagüe iyapoa, echa iporoparareko jekuae avei vae ko.

⁸ Oyapo kuaraɨ, omboesape vaerä ara pe, echa iporoparareko jekuae avei vae ko.

⁹ Oyapo yasɨ jare yasɨtata reta, omboesape vaerä pɨ̈tu yave, echa iporoparareko jekuae avei vae ko.

¹⁰ Pemboete, Egipto pe membɨrɨpɨ reta oyuka vae, echa iporoparareko jekuae avei vae ko.

¹¹ Israel iñemuña reta Egipto güi güɨnoe vae, echa iporoparareko jekuae avei vae ko;

¹² imbaepuere yae rupi güɨnoe vae, echa iporoparareko jekuae avei vae ko.

¹³ Ɨguasu Pɨ̈ta vae omboyao vae, echa iporoparareko jekuae avei vae ko;

¹⁴ Israel iñemuña reta güɨroasa jokoropi vae, echa iporoparareko jekuae avei vae ko.

¹⁵ Faraón isundaro reta ndive opa oyasoiuka Ɨguasu Pɨ̈ta vae pe vae, echa iporoparareko jekuae avei vae ko.

¹⁶ Oyangareko imbae vae reta re ñuu rupi vae, echa iporoparareko jekuae avei vae ko.

¹⁷ Mburuvicha guasu reta tuichagüe omoamɨri vae, echa iporoparareko jekuae avei vae ko.

¹⁸ Mburuvicha guasu reta imbaepuere yae vae oyukauka vae, echa iporoparareko jekuae avei vae ko.

¹⁹ Amorreo reta juvicha guasu Sehón oyuka vae, echa iporoparareko jekuae avei vae ko,

²⁰ jare mburuvicha guasu Og, Basán pegua, echa iporoparareko jekuae avei vae ko;

²¹ jare jae reta iɨvɨgüe omee imbae vae reta imbaerä, echa iporoparareko jekuae avei vae ko.

²² Omee jembiokuai Israel imbaerä, echa iporoparareko jekuae avei vae ko.

²³ Jae mbaetɨ iñakañɨ yandegüi mbɨatɨtɨ guasu pe ñaï yave, echa iporoparareko jekuae avei vae ko.

²⁴ Jae yandereepɨ yanderovaicho reta güi, echa iporoparareko jekuae avei vae ko.

²⁵ Jae omee tembíu opaete oikove vae reta pe, echa iporoparareko jekuae avei vae ko.

²⁶ ¡Pemboete Tumpa ara pe oï vae, echa iporoparareko jekuae avei vae ko!