SALMOS 135 - Biblia Guarani Tumpa IñeeSALMO 135 YandeYa imbaepuere yae tumpa-raanga reta güi 1 ¡YandeYa jembiokuai reta, pemboete yandeYa! 2 Pe itupao pe peï vae reta, ñaneTumpa itupao joka pe peï vae reta. 3 Pemboete yandeYa, petairari salmo reta pe chupe, echa jae ipɨakavi ko. 4 Echa jae oiparavo iyeupe tëta Israel, Jacob iñemuña reta. 5 Echa che aikuaa yandeYa tuicha yae ko, yandeYa tuicha yae ko opaete tumpa-raanga reta güi. 6 Opaete yandeYa oipota vae, oyapo, ɨvate ara pe jare ɨvɨ pe, ɨguasu pe jare opaete ɨ rugua tɨpɨ yae vae pe. 7 Omboyeupi amapɨtu reta ɨvɨ iyapɨ kotɨ güi, oyapo ama-vera, okɨ vaerä, güɨnoe ɨvɨtu, oñeovatúa güi. 8 Jae oyukauka membɨrɨpɨ kuimbae reta Egipto pe, jare mɨmba reta imembɨrɨpɨ vi. 9 Oyapo mɨakañɨ reta Egipto pe, Faraón kotɨ jare opaete iyɨvɨrigua reta kotɨ. 10 Omboai jeta tëtaguasu reta, jare oyuka mburuvicha guasu reta imbaepuere yae vae: 11 Sehón, amorreo reta juvicha guasu, Og, mburuvicha guasu Basán pegua, jare opaete mburuvicha guasu Canaán pegua. 12 Jare jókuae mburuvicha guasu reta iɨvɨ, omee Israel iñemuña reta imbaerä. 13 CheYa Tumpa, nderee opambae ko; ¡nderee re, jekuaekuae avei vae ko! 14 Echa yandeYa oyapota jupi vae imbae vae reta pe, oipararekota jembiokuai reta. 15 Tëtaguasu reta itumpa-raanga reta ko, korepoti jare oro peguaño; kuimbae reta jembiapoño ko. 16 Oime iyuru, ërei mbaetɨ imiari reta; oime jesa reta, ërei mbaetɨ oecha reta. 17 Oime iyapɨsa reta, ërei mbaetɨ oendu reta, ¡mbaetɨ kërai ave yepe oikove reta! 18 Opaete jókuae tumpa-raanga reta rami ko iyapoa reta, jare oyeko jese vae reta. 19 Israel iñemuña reta, ¡pemboete yandeYa! Aarón iñemuña reta, ¡pemboete yandeYa! 20 Pe Leví iñemuña reta, ¡pemboete yandeYa! Opaete yandeYa güi oipoɨu vae reta, ¡pemboete yandeYa! 21 ¡Sión güive toyemboeteuka yandeYa, jae oiko Jerusalén pe vae! ¡Aleluya! |
Biblia DC Guaraní Bolivia © Bolivian Bible Society, 2001.
Bolivian Bible Society