SALMOS 132 - Biblia Guarani Tumpa Iñee

SALMO 132 YandeYa güɨrökuavee David pe vae

¹ CheYa Tumpa, nemaendúa David re, opaete ipɨatɨtɨ reta re.

² Kërai jae jei nderee re oyapo vaerä vae, oñererökuavee Imbaepuere yae ete vae Jacob pe vae:

³ “Mbaetɨta aike chero pe, mbaetɨta ayapakua aputuu.

⁴ Mbaetɨta asapɨmi, mbaetɨta kërai yepe ake.

⁵ Aväe regua o jendarä Imbaepuere yae ete vae Jacob pe vae peguarä vae.”

⁶ Mase, Efrata kotɨ roikuaa käjou morogüɨrökuavee pegua, jare roväe chupe kaa pe.

⁷ ¡Roiketa itupao guakapi pegua pe! ¡Royetavatɨkata jóvai!

⁸ CheYa Tumpa, epüa, eyu nde jare nekäjou, reputuutaa pe.

⁹ Ndesacerdote reta toyemonde jupi vae pe; toyerovia ndembae vae reta.

¹⁰ Nderembiokuai David reaɨu jeko pegua, agüɨye eröɨro nderembiparavo.

¹¹ Añetete, yandeYa jei jee re aeño David pe, ngaraa jae oipoepɨ iñee; echa jei:

¹² “Añonota ndeporookuaía pe metei neñemuña reta güi, jae reta oyapo cheporogüɨrökuavee päve jare cheporookuai amboe retata vae yave, neñemuña reta vi oguapɨta ndeporookuaía pe jekuae avei pegua.”

¹³ Echa yandeYa oiparavo ɨvɨtɨ Sión. ¡Oiparavo jae oiko vaerä joko pe!

¹⁴ “Jae ko kuae ɨvɨtɨ aiparavo aiko avei jese vaerä vae, kuae pe aikota, echa jökorai aipota.

¹⁵ Cheporerekuata jeta tembíu rupi jese, paravete vae reta joko pe yogüɨreko vae amoangapɨɨta.

¹⁶ Amboyekuaata ndesacerdote reta re chembaepuere yemborɨ pegua, jare joko pe chembae vae reta oyeroviata.

¹⁷ Joko pe amboyepotata David imbaepuere, amee ma cherembiparavo pe oiko vaerä tembipe rami.

¹⁸ Jovaicho reta ambojopaukata, ërei jae iñäka-regua jembipeta oyekuaa.”