SALMOS 130 - Biblia Guarani Tumpa Iñee

SALMO 130 YandeYa oepɨta Israel vae regua

¹ CheYa Tumpa, ɨvɨkua guasu güi asapúkai ndeve körai:

² “¡CheYa, eyeapɨsaka cheñee re! ¡Eïndaivi reendu vaerä cheyerure romoñera reve vae!

³ CheYa, remae mbaeyoa reta yave, ¿kia pa ipuereta oï nderóvai?

⁴ Ërei nde ko neɨ̈ro vae, reyemboeteuka vaerä.

⁵ Opaete chepɨa ndive ko roäro cheYa, arovia neñee re.

⁶ Che roäro cheYa, oasa ete yé omaeäro vae reta güi; oipotaecha ma köe chupe vae rami.

⁷ Nde tëta Israel, eäro yandeYa, echa jae iporoparareko jare oporoepɨ vae ko.”

⁸ ¡Jae oepɨta Israel opaete iyoa reta güi!