SALMOS 13 - Biblia Guarani Tumpa Iñee

SALMO 13 Yemborɨ oyeporu mbɨatɨtɨ iara pe vae

¹ CheYa, ¿neakañɨta pa jekuae avei pegua chegüi? ¿Kërai yave regua pa reyerovata oregüi?

² ¿Kërai yave regua pa cheyemongeta rupi aiporara poita ara ñavo chepɨatɨtɨ vae? ¿Kërai yave regua pa cherovaicho reta jeia re aikota?

³ CheYa, Tumpa, ¡emae cheré, emaeño tamae tembipe re! ¡Agüɨye tamano!

⁴ ¡Agüɨye vaerä cherovaicho jei cheve: “Amoamɨri”! ¡Cherovaicho reta oyeroviata ko, chemoamɨri yave!

⁵ Ërei che ayeko ndeporoparareko re, chepɨa oyeroviata ndeporogüɨroasayepe re.

⁶ ¡Atairarita nde cheYa, echa nde reyapo ikavi vae cheve!