SALMOS 12 - Biblia Guarani Tumpa Iñee

SALMO 12 Yerure ikavimbae oyapo vae reta kotɨ

¹ OreYa Tumpa, orereroasayepe, echa mbaetɨve ma jupi rupi yogüɨreko ndeve vae, opa ma okañɨ kuimbae reta ipɨte güi.

² Iyapu päve oyoupe reta; omboyukɨ imiari reta oyoupe, iyemongeta ambuaeyee reve.

³ YandeYa omokañɨteita opaete iñee-yukɨ imiari vae reta, oyembotuicha reve imiari vae,

⁴ körai jei reta vae: “Ñaneñee rupi ñaporomoamɨrita ko, yandeyuru yandembae ko. Ngaraa kia ñanemokɨ̈rii.”

⁵ YandeYa jei körai: “Paravete vae jare mbae re oata vae reta re peyuvanga. Jáeramo, añave apüata, aroasayepeta, oeka tëi oasayepe vaerä yogüɨreko vae.”

⁶ YandeYa iñee ikɨambae ko; ¡korepoti oyeambae rami ko, oyekɨa yoe kavi yae horno pe vae rami!

⁷ Nde, oreYa oreangarekota; ¡oreövatu aveita jeko kavimbae vae reta güi!

⁸ Oreöva jeko kavimbae vae reta, opaete vae reta omboete ikavimbae.