SALMOS 115 - Biblia Guarani Tumpa Iñee

SALMO 115 Tumpa jare tumpa-raanga reta

¹ ¡Nderee emboeteuka oreYa! ¡Agüɨye ore toroyemboeteuka! ¡Emboeteuka ndeporoparareko jare neñee añete vae!

² ¿Maera pa añave jeita Tumpa re güɨroviambae reta: “Jama pa peTumpa”?

³ Nde, oreTumpa oime reï ara pe, nde reyapo ndepɨa oipota rami.

⁴ Jae reta itumpa reta ko oro pegua jare korepoti peguaño, kuimbae reta jembiapoño:

⁵ Oime iyuru, ërei mbaetɨ imiari, oime jesa reta, ërei mbaetɨ oecha,

⁶ oime iyapɨsa, ërei mbaetɨ oendu, oime itï, ërei mbaetɨ oëtu reta;

⁷ oime ipo reta, ërei mbaetɨ ipuere mbae oyavɨkɨ; oime ipɨ reta, ërei mbaetɨ oguata; ¡mbaetɨ mbae nunga ñee ave yepe oë iyaseo güi!

⁸ Jae reta rami etei ko iyapoa reta, jare vi güɨrovia jese vae reta.

⁹ Israel iñemuña reta, ¡peyeko yandeYa re! Jae ko pemborɨ jare peangareko vae.

¹⁰ Aarón iñemuña sacerdote reta, ¡peyeko yandeYa re! Jae ko pemborɨ jare peangareko vae.

¹¹ Pe, peipoɨu yandeYa güi vae reta, ¡peyeko yandeYa re! ¡Jae ko pemborɨ jare peangareko vae!

¹² ¡YandeYa imaendúa yanderé, iporerekuata ko yanderé! Iporerekuata ko Israel iñemuña reta re, iporerekuata ko Aarón iñemuña sacerdote reta re,

¹³ iporerekuata ko oipoɨu chugüi vae reta re, paravete vae reta re jare oikokatu vae reta re.

¹⁴ ¡YandeYa omoïruta ko iporerekua peré, peré jare peraɨ reta re!

¹⁵ ¡YandeYa ara jare ɨvɨ iyapoa, tiporerekua peré!

¹⁶ Ara reta yandeYa imbae ko, jare ɨvɨ omee kuimbae reta pe.

¹⁷ Omanogüe reta ngaraa ma omboete yandeYa, omanogüe reta ñogüɨnoia pe yogüɨraja ma vae reta;

¹⁸ ërei yande yamboeteta yandeYa, añave güive jekuae avei rupi. ¡Aleluya!