SALMOS 114 - Biblia Guarani Tumpa Iñee

SALMO 114 Yemomaendúa Egipto güi ñogüɨnoe vae regua

¹ Tëta Israel, Jacob iñemuña reta, ñogüɨnoe yave Egipto güi, ɨvɨ ambuae güi.

² Judá ou opɨta yandeYa pe mbaemboete oñemeea rendarä, Israel ou opɨta iporookuaía rendarä.

³ Ɨguasu oecha yave Israel iñemuña reta, otekuarai ɨguasu, jare ɨ̈aka Jordán, oñemoata jaɨkue kotɨ.

⁴ ¡Ɨvɨtɨ reta jare ɨvɨtɨ guasu reta ochäguariko reta vecha kuimbae rami jare vecha raɨ reta rami!

⁵ ¿Maratu pa ɨguasu, maera pa retekuarai? ¿Maratu pa ɨ̈aka Jordán, maera pa reñemoata nderaɨkue kotɨ?

⁶ ¿Maratu pa ɨvɨtɨ reta jare ɨvɨtɨ guasu reta, maera pa pechäguariko vecha kuimbae rami jare vecha raɨ reta rami?

⁷ ¡Ɨvɨ okana yandeYa jóvai, Jacob iTumpa jóvai!

⁸ ¡Jae ko oipoepɨ ɨ̈vavira ɨrɨrurä! ¡Jae ko oipoepɨ ɨ̈vavira ɨesaɨ jendarä!