SALMOS 112 - Biblia Guarani Tumpa Iñee

SALMO 112 Oiko kavi Tumpa güi oipoɨu vae

¹ Oyerovia ko kuimbae, yandeYa güiño oipoɨu vae, oñono ipɨa yandeYa iporookuai reta reño vae.

² Iñemuña reta imbaepuere yaeta kuae ɨvɨ pe, jupi vae reta iñemuña oyerovia katuta.

³ Jo pe oime aveita imbaembae jare imbaeyekou, jare ipɨakavi aveita.

⁴ Pɨtumimbía pe jembipe isɨmbi vae reta pe; jae ko iyeaeä vae reta, iporoparareko jare jupi vae reta.

⁵ Kuimbae jeko kavi vae, iporoparareko jare ombaeporuka; opaete mbaembae oyapo vae, oyapo jupi rupi kavi.

⁶ Jáeramo, ngaraai ogüɨapi. ¡Kuimbae jupi vae güi ngaraa iñakañɨ vae!

⁷ Ngaraa okɨɨye mbae ikavimbae reta jërakua vae güi. Ipɨakatu oï, oyeko yandeYa reño.

⁸ Ipɨakatu oï, ngaraa okɨɨye; oecha regua jovaicho reta isusere.

⁹ Omboyao mbae, paravete vae reta pe; ipɨakavi avei; imbaepuere oyembotuichata jare imboetea yaeta.

¹⁰ Iyoa vae oecha yave, iyarasɨta; ombokɨrɨrɨuta jäi, ërei okañɨteita, iyoa vae reta jemimbota opata.