SALMOS 111 - Biblia Guarani Tumpa Iñee

SALMO 111 Tumpa oyangareko imbae vae reta re

¹ ¡Tamboete cheYa, opaete chepɨa ndive! Jupi vae reta oyemboatɨ vae ndive.

² YandeYa jembiapo reta tuichagüe ko, oaɨu vae reta jókuae oeka.

³ Ipöra yae ete ko jae jembiapo reta, jare imbaejupi jekuae avei vae ko.

⁴ Ñaneakañɨ rapembae ko mɨakañɨ reta oyapogüe güi. YandeYa, iyeaeä jare iporoparareko vae ko;

⁵ oipoɨu chugüi vae reta pe omee tembíu; ¡imaendúa aveita, morogüɨrökuavee päve oyapo vae re!

⁶ Imbaepuere oechauka imbae vae reta pe, jembiapo reta rupi, omee ramboeve chupe reta tëtaguasu reta iɨvɨ.

⁷ Tumpa jembiapo reta jupi jare añete ko, opaete iporookuai reta jupi ko,

⁸ oñono ko jekuae avei pegua, oyapo ko añete rupi jare jupi rupi.

⁹ Oepɨ imbae vae reta, oñono iporogüɨrökuavee päve jekuae avei pegua. Jee ikɨambae jare ikɨɨyea ko.

¹⁰ YandeYa güi yaipoɨu vae re ko oï arakuaa katu; yarakuaa katu ko, opaete oyapo yandeYa iporookuai reta vae. ¡Tumpa oyemboete aveita ko!