SALMOS 11 - Biblia Guarani Tumpa IñeeSALMO 11 YandeYa jae ko jupi vae iñepɨ̈roa 1 CheYa reño ko ayeko, jayave mbaetɨ jupi jei vaerä chekotɨ vae: “Totekuarai ɨvɨtɨ kotɨ güɨra rami.” 2 Echa jeko kavimbae reta omoata igüɨrapa, oñono kavi juvɨ igüɨrapa re, oñɨvo vɨari vaerä jupi vae reta iparanoe. 3 Kuimbae iyeroviaka reta oikomegua yave, ¿mbae pa oyapota jupi oiko vae? 4 CheYa oï jëta ikɨambaea pe. CheYa iguapɨa güɨnoi ara pe, jae oecha opaete vae, omae kavi yae opaete kuimbae reta re. 5 YandeYa omae kavi jupi vae reta re, ërei omotareɨ jeko kavimbae vae reta jare ipɨarai vae reta. 6 Jeko kavimbae reta re ombouta mbaesusere tuicha vae, omongɨta jese reta tata azufre ndive, jare ɨvɨtuakuvo ombouta jese reta oapɨ vaerä. ¡YandeYa oiporaraukata chupe reta jeko re! 7 Echa yandeYa jupi vae ko, oaɨu mbae jupi rupi oyeapo vae. ¡Jupi rupi oiko vae oechata jova! |
Biblia DC Guaraní Bolivia © Bolivian Bible Society, 2001.
Bolivian Bible Society