SALMOS 107 - Biblia Guarani Tumpa IñeeSALMO 107 Tumpa oporoepɨ mbɨatɨtɨ güi 1 Pemboete yandeYa, echa jae ko ipɨakavi, echa iporoparareko jekuae avei vae ko. 2 Jovaicho reta güi yandeYa oepɨ vae reta tei jökorai, jovaicho reta imbaepuere güi yandeYa oepɨ vae reta, 3 ïru tëtaguasu reta güi opa omboatɨ vae reta, kuaraɨ oëa kotɨ güi, kuaraɨ oikea kotɨ güi, ɨvɨtuguasu kotɨ güi jare arayevɨ kotɨ güi. 4 Opa yepi jopa reta ñuu rupi, tapembaea kïrii ngatúa rupi, mbaetɨ oväe reta tëta guasu, pɨpe yogüɨreko vaerä; 5 yɨmbɨaɨ reve jare iɨuve reve, opa potaecha ma omano reta yepi. 6 Ërei oiporara ñogüɨnoi yave osapúkai reta yandeYa pe, jare jae oepɨ mbɨatɨtɨ reta güi. 7 Javoi güɨraja isɨmbi, tëta guasu yogüɨrekota pɨpe vae pe. 8 Pemboete yandeYa iporoparareko re, ¡mbae ikavi vae oyapo kuimbae reta peguarä vae re! 9 Echa jae omoangapɨɨ, mbae oata chupe vae, omee jeta tembíu, yɨmbɨaɨ vae pe. 10 Pɨtumimbía pe jare ñamano rape katúa pe yogüɨreko reta, mbɨatɨtɨ rupi avei yogüɨreko reta, karena pe oyepokua rami yogüɨreko reta. 11 Oyembopɨapochɨ reta yandeYa iporookuai kotɨ, jare güɨröɨro reta Tuichagüe yae ete vae iyemongeta. 12 Jáeramo, Tumpa oiporarauka chupe reta mbaravɨkɨ täta yae vae rupi; ogüɨapi reta yave mbaetɨ kia omborɨ vaerä. 13 Ërei oiporara ñogüɨnoi yave, osapúkai reta yandeYa pe, jare jae oepɨ mbɨatɨtɨ reta güi; 14 güɨnoe pɨtumimbía güi jare ñamano rape katúa pe yogüɨrekoa güi, jare oyora tembipɨɨrä yogüɨrekoa güi. 15 Pemboete yandeYa iporoparareko re, ¡mbae ikavi vae oyapo kuimbae reta peguarä vae re! 16 ¡Echa jae opa oakɨo öke reta jiero iyu vae pegua! ¡Opa oakɨo jiero öke reta imotätaa reta! 17 Oiporara yarakuaambae reta, ipɨapochɨ reta jare jembiapo kavimbae jeko pegua, 18 mbaetɨ yɨmbɨaɨ reta; ¡omano vaerä ma ñogüɨnoi reta! 19 Ërei oiporara ñogüɨnoi yave osapúkai reta yandeYa pe, jare jae oepɨ mbɨatɨtɨ reta güi; 20 ombou iñee jare ombogüera reta; ¡güɨroasayepe reta mano güi! 21 Pemboete yandeYa iporoparareko re, ¡mbae ikavi vae oyapo kuimbae reta peguarä vae re! 22 Pemee mbaemboete Tumpa pe, pemoërakua yerovia rupi jembiapo reta regua. 23 Maemee regua reta oa ɨguasu pe, jare ibarco pe oasa reta ɨguasu, 24 jae reta oecha yandeYa oyapogüe, ɨguasu mbɨte pe oecha reta jembiapo oporombopɨakañɨ vae. 25 Echa jae omoë iñee yave, oñemopüa ɨvɨtuai yavaetegüe, jare omopüa ɨaparúa tuichagüe; 26 ɨvate ɨaparúa pe oyemombouka reta, jare ɨ́vɨkotɨ güɨrogüeyɨ reta ɨaparúa, ¡mbaetɨ mbae ipuere oyapo reta jókuae susere pe! 27 Orɨrɨi jare jesagüɨrɨ reta osavaɨpogüe rami, ¡ipoki ave mbaetɨ omborɨ reta! 28 Jayave oiporara ñogüɨnoi yave osapúkai reta yandeYa pe, jare jae oepɨ mbɨatɨtɨ reta güi. 29 Oipoepɨ ama ɨvɨtuai reve vae, ɨvɨtu mbegüe kavi yandepeyu vae pe, jare ɨaparúa, kïrii ngatu opɨta. 30 Javoi oyerovia reta, echa oecha ɨaparúa opa kïrii ngatu, jökorai Tumpa güɨraja jae reta ikɨ̈reɨ yogüɨrajaa kotɨ. 31 Pemboete yandeYa iporoparareko re, ¡mbae ikavi vae oyapo kuimbae reta peguarä vae re! 32 ¡Pembotuicha, peyomboatɨa pe! ¡Toyemboete, tenondegua reta oyomboatɨa pe! 33 Jae ko ɨ̈aka reta oipoepɨ, ɨvɨ ipombae vaerä, jare ɨesaɨ reta, ɨvɨ otini vae pe; 34 ɨvɨ kavi oipoepɨ, ɨvɨ ikavimbae pe, pɨpegua reta iyoa jeko pegua; 35 ñuu oipoepɨ, ɨupa pe, jare ɨvɨ otini vae, ɨesaɨ pe; 36 joko pe oñono poriau yae vae reta, joko pe omopüa reta jëta retarä. 37 Omaetɨ reta kó pe, oñotɨ reta uva, jare jeta imbaagüɨye reta. 38 Jae iporerekua jese reta, omoñemuña jetagüe; jökoraiño vi jɨmba reta. 39 Javoi, omano reta, jare jeta veä ma, güɨrekoasɨ katu vae rupi, susere jare mbaerasɨ jeko pegua rupi, 40 Tumpa omotareɨ oiporarauka chupe vae reta, jáeramo ko, opa ombojopauka reta ñuu rupi, tapembaea rupi omboguataukaiño reta. 41 Jae ko güɨnoe avei paravete vae reta mbaravete güi vae; ¡jare omee jeta oñemuña reta vaerä vecha rami! 42 Kuae oecha kuimbae jupi vae reta jare oyerovia, ërei opaete jeko kavimbae reta kïrii opɨta. 43 Yarakuaa katu vae, ngaraa ñakañɨ kuae güi, jare oikuaa katuta yandeYa iporoparareko reta. |
Biblia DC Guaraní Bolivia © Bolivian Bible Society, 2001.
Bolivian Bible Society