SALMOS 106 - Biblia Guarani Tumpa Iñee

SALMO 106 Israel iñemuña reta oyembopɨapochɨ

¹ ¡Aleluya! Pemboete yandeYa, echa jae ko ipɨakavi, echa iporoparareko jekuae avei vae ko.

² ¿Kia pa ipuere jei kavi yandeYa jembiapo reta tuichagüe regua? ¿Kia pa ipuere omboete jupi rupi kavi yandeYa?

³ Oyerovia ko, jupi vae oyapo vae reta, jupi vae oyapo avei vae reta.

⁴ CheYa Tumpa, nemaendúa cheré reyapo yave ikavi vae ndembae vae reta pe; nemaendúa cheré reyu reporogüɨroasayepe yave,

⁵ aecha vaerä nderembiparavo reta iyerovia, ayerovia vaerä vi ndembae vae reta iyerovia re, ayemboete vaerä tëta ndembae vae reta re.

⁶ Oreyoa vi oreñemuñagüe reta rami, royapo ikavimbae, royapo jupimbae.

⁷ Egipto pe mɨakañɨ reta tuichagüe reyapo vae mbaeä etei oreñemuñagüe reta pe; mbaetɨ imaendúa reta ndeporoparareko yae ko vae re, Ɨguasu Pɨ̈ta vae jembeɨ pe oyembopɨapochɨ reta ndekotɨ.

⁸ Ërei Tumpa güɨroasayepe, oaɨu jee ramo; oechauka vaerä imbaepuere.

⁹ Iñee omoë Ɨguasu Pɨ̈ta vae pe, jare oyemboyao. Jeta vae güɨroasa ɨ rugua rupi, ñuu rupi oasa rami.

¹⁰ Jökorai, güɨroasayepe tovaicho reta güi, imotareɨa reta ipo güi.

¹¹ Ɨ opa oyasoi jovaicho reta, mbaetɨ etei jembɨre metei ave.

¹² Jayave, güɨrovia reta Tumpa iñee re, jare otairari reta mbaemboete chupe.

¹³ Ërei ɨmambae pegua ñakañɨ reta Tumpa oyapogüe güi, mbaetɨ oäro reta oikuaa vaerä jae iyemongeta.

¹⁴ Ombotenonde reta ipɨa jemimbotaño ñuu pe, ojäa reta Tumpa ipɨaguasu ɨvɨ ipombaea pe.

¹⁵ Jae omee chupe reta, jae reta oiporugüe, ërei ombou chupe reta manoɨvɨ.

¹⁶ Teyupa pe iyakatúä reta Moisés re, jare Aarón, Tumpa oñono tee vae re.

¹⁷ Jayave oyepeka ɨvɨ, jare opa omókoi Datán, jare vi Abiram jupiegua reta.

¹⁸ ¡Tata jendɨ ikotɨ reta! ¡Opaetei oapɨ jókuae jupimbae reta!

¹⁹ Horeb pe oyapo reta iyeupe toro taɨrusu vae iä, oyetavatɨka reta mbae iä oro oyemondɨkuigüe pe oyapo reta vae jóvai.

²⁰ ¡Jökorai oipoepɨ reta Tumpa tuicha yae vae, metei toro ñana iua iägüe ndive!

²¹ Ñakañɨ reta jeroasayepea Tumpa güi, jókuae jeta mɨakañɨ tuichagüe oyapo Egipto pe vae güi,

²² jeta mɨakañɨ oyapo Cam iɨvɨ pe vae, mbae oporombopɨakañɨ yae vae oyapo Ɨguasu Pɨ̈ta vae pe vae.

²³ Tumpa opata tëi omboai reta, ërei jembiparavo Moisés oyopia, omoröɨsa iyarasɨ chugüi, agüɨye vaerä opa omboai.

²⁴ Jaɨkue rupi güɨröɨro reta ɨvɨ kavi, mbaetɨ güɨrovia reta Tumpa iñee re;

²⁵ jo guakapi pegua rupi iñeenguru reta yandeYa kotɨ, mbaetɨ oyapo reta jae jei vae.

²⁶ Jáeramo, jae ipo oupi reve jei jee re aeño opa vaerä omokañɨtei reta ñuu pe,

²⁷ omomichiuka vaerä tëtaguasu reta ñavo pe, jare opa omoai moai opaete ɨvɨ rupi.

²⁸ Jare oyemboya reta tumpa-raanga Baal-peor re, jou reta mɨmba oyeyukagüe, oikovembae pe oñemee vae.

²⁹ Jeko reta ikavimbae pe omboarasɨuka reta Tumpa, jare ou manoɨvɨ jese reta.

³⁰ Ërei Finees opüa jare oyuka jókuae teko iya, jökorai jókuae manoɨvɨ osondo.

³¹ Jókuae oyapogüe re Tumpa omae jese, jupi jekuae avei rupi vae.

³² Ɨ Meriba pe omboarasɨuka reta vi Tumpa, jae reta jeko pegua Moisés pe oyavɨuka.

³³ Echa omboarasɨuka reta, jáeramo, jei rai rai voi mbae.

³⁴ Mbaetɨ opa omboai reta tëta reta, yandeYa oyókuai tëi omboai reta vaerä vae.

³⁵ Ërei oyea reta tëtaguasu reta ndive, jare omomoe reta jeko reta:

³⁶ Omboete reta jókuae tëta reta itumpa-raanga reta, jókuae jeko pegua oñererokomegua reta,

³⁷ oyuka reta taɨ reta jare tayɨ reta, omee vaerä mbota aña reta pe.

³⁸ Opɨyere reta jekombae jugüɨ; taɨ reta jare tayɨ reta jugüɨ, omee reta mbotarä tumpa-raanga Canaán pegua pe. Omongɨa reta jókuae ɨvɨ, jókuae tugüɨ pe,

³⁹ jökorai, oyemongɨa reta oyapogüe pe, oñererokomegua reta aguasa pe rami jembiapo reta rupi.

⁴⁰ Jáeramo, yandeYa iyarasɨ imbae vae reta kotɨ, jare güɨröɨro imbae vae reta;

⁴¹ omee tëtaguasu reta ipo pe, jare jovaicho reta güɨnoi mbaepuere jese reta;

⁴² jókuae jovaicho reta oiporarauka yae chupe reta, omomichi reta imbaepuere igüɨ pe.

⁴³ Tumpa, güɨroasayepe avei reta, ërei jae reta oyembopɨapochɨ Tumpa oipota tëi oyapo vae kotɨ. Jáeramo, jeiete oñeäka pɨpɨ reta jeko kavimbae pe.

⁴⁴ Ërei jeseve, omae jese reta oiporara reta ñogüɨnoi yave, jare oendu chupe reta iyerure ipɨatɨtɨ reve vae,

⁴⁵ imaendúa morogüɨrökuavee päve oyapo jae reta ndive vae re, jare oipoepɨ iyemongeta, iporoparareko yae jeko pegua.

⁴⁶ ¡Yepe tëi jae reta yogüɨreko imoamɨría reta ipo pe, ërei Tumpa omee vi jókuae reta, güɨnoi vaerä mboroparareko jese reta!

⁴⁷ ¡Orereepɨ OreYa Tumpa! ¡Orereru ye tëtaguasu reta güi, orepuere vaerä romboete nderee ikɨambae vae, romboete vaerä royerovia katu reve!

⁴⁸ ¡Mbaemboete toiko ndeve jekuae avei rupi cheYa Israel iTumpa! ¡Opaete vae tei: “Amén”! ¡Aleluya!